Pagbasol batok pagpasalamat

Gikataho nga ang mga gagmay nga patigayon dako og kahigayonan nga mokita atol sa pagsaulog sa Kalag-kalag ilabi na gayod sa mga manindahay og mga bulak nga maoy gitumbok nga labing himalitan karon. Tinuod gayod ang obserbasyon nga mas daghan ang mga bulak nga madawat sa mga patay kay sa mga buhi pa. Kini tungod kay naghingapin man sa tawo ang kinaiya sa PAGBASOL kay sa PAGPASALAMAT.  Faeetz!

Dili lang unta modus

Gitun-an karon sa Department of Trade and Industry ang posibilidad nga ibutang pagbalik  ang plywood sa talaan sa mga produkto nga nagkinahanglan og “mandatory certification” nga kini nakapasar sa gilatid nga standards, nunot sa pagdagsang niini sa merkado sa miaging upat ka tuig.  Hinaut nga dili kini modus tali sa gobyerno ug mga negosyante aron mapatas-an na usab ang presyo sa plywood pinaagi kunohay sa regulasyon.  Alaot na pud ang katawhan kon maingon!

Balaod sa “supply ug demand”

Sa may kalambigita’ng balita, miawhag usab ang DTI sa katawhan nga adto lamang mopalit og kandila ug mga binotelya’ng tubig sa mga dagkong tindahan aron sila makadaginot kay matud pa, ang presyo sa mga dagko’ng tindahan nasubay man sa gilatid sa DTI nga SRP kon suggested retail price.  Niining sitwasyona, awhag ra gayod ang mahimo sa DTI; sa kapulihay, ang kasayon ug convenience sa mamalitay mao ra gihapon ang mopatigbabaw, dili ang presyo. Makapahihunumdum kini kanako sa komedya nga buot ipa-amendar sa usa ka Presidente ang “Law of Supply and Demand” aron matabangan ang mga kabos.  Saoonz!

Pawong-siga ang solusyon

Gitun-an karon sa giumol nga Task Force sa MCDCB ang mga pamaagi aron maluagan ang dagan sa trapiko labi na diha sa mga national roads.  Lakip sa una’ng nakita nga solusyon mao ang pagpalong sa mga traffic lights sa mga pinili nga intersection. Wala ba diay pasiuna nga pagtuon nga gihimo kon angayan ba butangan ug traffic lights ang gitumbok nga mga intersection? Ngano man nga human mogasto ug minilyon aron mataud ang maong mga traffic lights, palungon man hinoon sa tuyo nga masulbad ang trapiko. Gausik-usik lang jud kini sila sa kwarta sa gobyerno. Pagkatoytoy!

Daan na nga malinawon

Malinawon ug hapsay karon ang mga sam-ang sa Metro Cebu bisan pa man sa pagsaulog sa adlaw sa mga minatay. Mao kini ang gilarawan nga kahimtang sa mga hingtungdan nga awtoridad.  Malinawon man gayod ang mga sam-ang kon sementeryo; mahimo lang kini nga saba ug aliwaros tungod sa mga buhi nga modagsa sa maong lugar atol sa kasaulogan sa kalag-kalag. Giklaro lang diay sa polis ang tataw na daan.  Trick or Treat!