EDITORYAL - Para sa mga Santos ug mga Kalag

Magpanon na usab ang katawhan sa nagkadaiyang mga sam-ang tibuok nasud aron duawon ang mga minahal sa kinabuhi nga mitaliwan na sa laing kalibotan.

Sa unang panahon, ang mga Pilipino nagtuo nga ang mga mitaliwan mobalik ra sa kinaiyahan isip mga espiritu ug maoy mogiya sa mga nabiyaang mga buhi sa ilang inadlaw-adlaw nga kinabuhi.

Apan sukwahi sa karon, kaniadto bisan unsang adlawa duawon ang mga minatay sa ilang mga lubnganan tungod sa kamingaw ug pagpangayo og giya o tabang kay giisip man sila nga makakita sa umaabot nga panahon.

Butang nga wala na kaayo buhata sa kadaghanan kay magpaabot nalang sa Nobiyembre Uno ug Dos, nunot sa mao nay gitudlo o napasa dala sa pagabot sa Kritiyanismo dinhi sa Pilipinas dul-an 500 ka tuig na ang nakalabay.

Bugtong nagpabilin mao ang paghalad og mga pagkaon, ilimnong makahubog ug mga paboritong gamit sa mga minatay nga ibilin isip halad kanila diha sa ilang mga lubnganan ug napun-an lang sa pagdagkot og kandila ug paglitok og orasyon o pangadyi alang sa mga minatay.

Pinaagi sa relihiyon, napasa sab sa mga Katsila ang ilang tradisyon ug kultura sama sa pagtimaan sa Todos los Santos o adlaw nga mga santos ug Los Fieles Difuntos o adlaw sa mga minatay.

Anaa saba ang gitawag nga Halloween nga nagsugod didto sa Uropa. Para lang unta kini sa mga bata nga magsuot og nagkalain-laing costumes aron magbalaybalay og trick or treat, apan gisunod sab sa mga hamtong.

Apan kini nga mga modernong pasundayag gihulagway sa Simbahan nga selebrasyon nga naimpluwensyahan sa yawa nakighudyaka ang mga tawo sa mga binuhat sa kangitngit.

Bisan unsa pay gisunod, basta dili unta kalimtan ang pagampo ug pagpangayo pasaylo ngadto sa Kahitas-an sa mga sala nga nabuhat sa mga minatay samtang buhi pa sila ibabaw sa yuta.

Ug labaw sa tanan ang pagpakita og pagmahal sa mga buhi ngadto sa ilang mga mitaliwang mga minahal sa kinabuhi pinaagi sa kinasing-kasing nga pagduaw ug pagampo para sa kaluwasan sa ilang mga kalag.