Mayor nga dayo nangulata sa sugbo

Usa ka massage therapist ang midangop sa kapolisan sa Station 2 sa Cebu City Police Office human giingong gidapatan siya sa usa ka mayor nga kliyente sa ilang health spa sa uptown area ning dakbayan sa Sugbo.

Matod sa reklamante nga gustong magpaserbisyo ang mayor apan wala namay available nga babaye’ng masahista hinungdan nga nasuko kini.

Nanghagit pa sa mga tawo sa usa ka health spa nga mobayad og tag 1,000 pesos apan pangkulatahon ang mga lalaking masahista. Dinhi mihangyo ang biktima nga si John Dueñas sa mayor nga mokalma lang kay nangahadlok na ang mga kaubang babaye nga staff sa spa.

Apan siya naman hinoon ang gikulata kauban ang mga bodyguards niini diin naigo sa iyang kuto-kuto, likod ug sampot. Ang pagpangulata nakuhaan og video sa CCTV sa establisemento nga maoy lig-ong ebidensya sa biktima kinsa gisuportahan usab sa management sa health spa sa iyang reklamo.

Gawas sa physical injury, gibutyag ni Police Major Eduard Sanchez sa Abellana Police Station nga dunay laing reklamo ang atubangon sa mayor.

Kini mao ang pagbinastos sa usa ka babayeng massage therapist kinsa gipugos niini nga iapil sa pagpamasahe ang iyang kinatawo.

Dihang miresponde ang kapolisan sa establisemento giingong natulog na ang mayor.

Ang mga kauban niini ang miingon nga mopatim-aw sa police station inig mata apan nabuntagan nalang ug namuti ang mata sa pulis wala gyuy mayor nga mipatim-aw.

Ang suspek nailhan nga mayor pinaagi sa tarp diin naa ang ngalan niini nga mayor sa usa ka lungsod sa Misamis Occidental nga mitambong sa kalihokan nga gipahigayon dinhi sa dakbayan. Tataw og dayag kaayo ang kuha sa cctv nga dili gyud makapamakak ang mayor busa gikinahanglan nga tinud-on kini sa mga otoridad. Matud sa hepe sa kapolisan nga no one is above the law busa ila gyud ipadayon ang kaso.

Maayo unta kun dili lang sa sinugdanan init kaayo ang reklamo apan sa ngadto ngadto mawagtang ra kay wala nay interest ang reklamante. Pastilan pagka abusado mayora mao pay midayo dinhi sa Sugbo, siya pa ang namwerhisyo.

Walay luna sa atoa ang mga abusado og hambugero nga bisita, kumo mayor yatakan nang ang mga gagmay’ng tawo.