Ang Dios Miingon Pagpamalandong matag Domingo

Oktubre 20, 2019: Ikakawhaag-Siyam

nga Domingo sulod sa tuig

Mga Pagbasa:  Ex. 17,8-13/

Sal. 121/2Tim. 3:14-4:2/Lk. 18:1-8

Sakit palandungon ang reyalidad ning atong kapanahonan karon nga tungod niini mahimong suwayan gyud ang atong pagtuo, matang sa pagsuway nga magdala kanato ngadto sa walog sa mga pagduda kun molihok ba gyud ang Ginoo sa atong mga panginahanglan o maantigo ba siyang mosud-ong sa atong panginahanglan, Dios ba gyud siya nga mobati o Dios ba nuon siya sa halayo.

Ang atong ebanghelyo karon nag-asoy sa maghuhukom nga way pagpakabana sa Dios ni sa tawo nga gihasol sa biyuda. Kining biyuda kaniadto kuyog sa mga kabataan ug sa kababayen-an ang nahisakop sa mga marginalized sector sa katilingban. Sa ato pa wa sila’y tingog. Wa silay kaugalingong desisyon. Nagsalig lang gyud sila sa mga kalalakin-an. Mao ning hinungdan kun nganong nagpakitabang siya sa maong maghuhukom nga niangkon sa iyang pagkalimpingasan. Bisan supak sa iyang kabubut-on ang maong maghuhukom nihatag sa iyang pagbulig tungod kay siya mismo  ang nahimo mang gisamokan sa maong biyuda.

Ang maong sanglitanan maoy gigamit sa atong Ginoo sa pagtudlo nato nga dili maayong wad-on ang paglaum ug sa kanunay kita gyud mag-ampo. Ang makanunayong pagsunggal dili man pagsamok kun dili pagpakita lamang nga kita mismo ang seryoso gyud sa atong gipangayo. Kun ugaling dili dayon mahatag ang atong gusto nagpasalamat kini og dili pa gyud nato panahon sanglit may perfect time ang matag hangyo ug matag pangamuyo. In God’s own time matud pa.