EDITORYAL - Pamolitika ang hinungdan

Politika. Kini maoy nakitang babag nganong wala mapangandami ang krisis sa trapiko nga nasinati karon didto sa Metro Manila.

Matud pa sa usa ka urban planning expert nga si Felino Palafox Jr., gitagna nang daan nga mahitabo ang maong krisis 43 ka tuig na ang nakalabay, apan wala gyud kini mapangandami.

Sumala pa nga nagpalabi ang pamolitika ug ang kinaiyang pagkamaiya-iyahon sa mga lokal nga lider maoy nakaingon niini.

Apan dili ikalimod nga ang Sugbo duna say nahitabong pamolitika sa mga lokal nga lider sa nangaging mga tuig, mao bitaw nga karon nabatyagan na ang epekto niini diha sa kadalanan.

Tungod kay dunay mga mayor nga dili gustong mokooperar sa ilang kasikbit nga mga lugar kay dako ilang pagtuong sila ray maayong laki ug sila ray mas nakahibalo mao nga wala sila magkinahanglan sa uban.

Gani makita kini sa managlahing mga traffic ordinances sa matag siyudad sa Metro Cebu hasta sa mga kasikbit nilang mga lungsod.

Dunay dili estrikto sa usa ka partikular nga traffic violation apan sa uban estrikto kaayo. Mao nga lisud kaayo ug makapalibog sa mga motorista.

Hinuon, sama sa gikaingon na sa nakalabay nga editorial sa Banat News, bisan nauwahi na kini sa gidaghanon sa mga gipangtukod nga imprastraktura kun itandi sa Metro Manila, mas bulahan pa gihapon ang taga Cebu. Kini tungod kay bisan og nasinati na ang problema sa traffic ug mga paglunop sa baha dili pa tantong uwahi kaayo ang tanan aron klaruhon ug ayuhon ang urban planning niini.

Ang kinahanglan lang mao ang kooperasyon sa mga mayor pagplano sa matag karsada, blocks, mga kanal, taytayan ug uban pang may kalabotan sa transportasyon ug flood control system.

Dili pa kaayo tantong naghuot ang tanan dinhi, dili sama didto sa Metro Manila. Kinahanglan lang nga mokooperar ang mga mayor sa plano sa usa’g-usa aron kini usahon ug usa ray sistemang sundon sa tanan.