Krisis sa transportasyon

Mikagat si Secretary Salvador Panelo sa hagit sa katawhan nga mosakay og public transportasyon human sawaya sa iyang pamahayag nga mosayo ug lakaw kun dili gusto malangay pag-abot sa ilang trabaho ug adtoan.

Sa miaging semana hapit moabot sa upat ka oras ang pagbiyahi ni Secretary Panelo. Nakit-an si Panelo nga misakay sa jeep sulod sa tulo ka higayon habal-habal na ang iyang gisakyan sa iyang ikaupat nga pagsakay. Wala masayri diin manukad si Panelo sa iyang pagsakay.

Bisan moabot hapit upat ka oras ang pagbiyahi ni Secretary Panelo sakay sa jeep ug habal-habal, iya gihapon nga gibarogan nga walay krisis sa transportasyon dinhi sa Metro Manila.

Giingon ni Panelo nga dugay na unta nga nasulbad ang grabing ka trapik sa Metro Manila kun wala pa unta ihikaw sa Kongreso ang gipangayo sa Presidente nga emergency power.

Kahinumduman, gipasalig ni Presidente Rodrigo Duterte nga iyang sulbaron ang trapik sa EDSA ug ubang kadalanan sa Metro Manila sulod lamang sa pipila ka buwan sa iyang paglingkod apan human makalingkod sa Malakanyang ang Presidente niadtong Hunyo tuig 2016 misamot na hinuon ka grabe ang suliran sa trapiko.

Ang suliran sa trapik dili masulbad sa emergency power kun ugaling ihatag man kini sa kongreso ngadto kang Presidente Rodrigo Duterte.

Ang suliran sa trapik mugna kini sa kapakyas sa mga urban planners sa paglantaw sa unahan sa dihang ilang gimugna ang kadalanan ug gitugotan sa kagamhanan ang pagpadaghan sa mga sakyanan. Ang suliran sa trapik mugna usab kini sa miburot nga populasyon sa nasud ug gitampohan usab kini sa kakulang sa disiplina sa katawhan.

Wala mag-inusara ang Metro Manila sa suliran sa grabing trapik. Ang trapik miabot na sa Metro Cebu ug sa ubang dapit sa nasud tungod sa kadaghan na sa mga sakyanan nga gipabaha sa mga namaligya og sakyanan.

Mas maayong pangandaman sa mga lokal nga kagamhanan sa Metro Cebu ang mahimo unyang susamang sinaryo nga mahitabo sa umaabot.