Nganong bibliya di maukab og wa nay mohatag

Maoy akong namat-ag buot ang kinabuhing kabus. Busa, kutob ra intawon sa payag ang among kapuy-an. Apan bisan pa sa kalisod, gitun-an mi nilang Tatay Andot ug Nanay Totang pagsangpit-salig kanunay sa Ginoo sulod ug gawas sa simbahan.

Kay matud nila, dili gyud biyaan sa Ginoo ang magtutuo nga dili mobulag Kaniya. Maong kada Domingo manimba gyud mi. Unya, magsul-ob gyud og bronda si Nanay.

Pag-abot sa simbahan, hilom na mi tanan. Bisag tibuok pamilya nagtupad sa usa ka lingkoranan, wala gyuy magtabi. Tanang mata gitutok sa altar, nagpaabot sa pagsugod sa misa ug misabat-apil sa mga kanta ug pangadye hangtod sa pagkatapos.

Mahibulong kong Nanay. Kay bisag laing adlaw, walay misa, kalit lang ko niyang dad-on sa simbahan ug didto atubangan sa altar, moluhod siyag dugay samtang kinasingkasing nga nag-ampo. Wala ko makadungog unsay iyang giyangongo sa Ginoo, pero nakita ko ang pagkauyog sa iyang bukobuko ug ang pagdahili sa iyang mga luha.

Wala pa ko moeskuyla, gigiyahan na kong Nanay pagtambong kanunay sa katekismo nga kanunay’ng ipahigayon sa kombento sa Balamban Parish Church, diin kada human, kaming mga bata magbitbit og bolsita nga puno sa sopas, candies, lollipops ug uban pa sa among pagpamauli.

Pag-eskuyla nakog kartel sa Balamban Elementary School, hangtod na sa akong pagraduwar sa elementariya, kada alas 12:30pm ngadto sa ala 1:30 sa hapon, may katekista gyong moadto sa among klasrom aron motudlo sa pagpangadye, moistorya sa mga parables nga anaa sa ebangheliyo ug gidasig gyod mi pagbasa og bibliya.

Mao nga gihatagan ming tanang tinun-an og bibliya. Ang gidak-on mas gamay sa libro. Unya, iningles pa gyud. Kaniadto sa among panahon, ang medium of instructions nga gigamit sa public schools, diin ko magtungha, binisaya. Nindot unta kun ang Bibliya nga gipanghatag binisaya sab. Kay mas masabtan sa mga linghod nga nagtuontuon ug makadasig pagbasa pa more.

Kini ang hinungdan, nganong ang bibliyang anaa sa panimalay, abogan ug agup-upon na lang hangtod mangataltag nga dili maukab.

Ug usab, tingali maoy rason ngano ning atong panahon, wala nay motunol og Bibliya nga libre alang sa tanang tinun-an.

Ang Katolikong Simbahan, may gihimo ba pagsulbad ning maong suliran?