Balik sa Sibonga

Salamat ni Padre Blurred nga nidapit nako aron motambong sa novenario pahinungod sa Nuestra Senyora del Pilar ang patrona sa parokya. Mga pulo na ka mga tuig ang nilabay sa dihang gihimo ang pagpabalik sa maong kasaulogan. Salamat sa Birhen nga nahimo kining katumanan.

Sa maong pagbalik nanumbalik usab ang mga kasinatian, nahimong lab-as ang panaghigalaay kuyog sa mga nahimong kabahin na sa kinabuhi. Mga tawo nga panahon sa kalipay ug kaguol anaa gyud kanunay kanako misapnay.

Mga tawo nga dili mahimong makalimtan tungod sa ilang kamatinud-anon ug sa ilang mainitong pagbati. Ingon ana ang taga Sibonga mao nga salamat gyud dako uyamot kanila.

Ang pagpasalamat kabahin gyud sa kinabuhi. Gani ang timaan nga ikaw mapasalamaton mao nga maantigo kang mobalik lantaw sa imong gigikanan. Hinuon dunay mga higayon nga bation mo usab ang daghang kasakitan apan kabahin lamang kini sa panaw sa kinabuhi. Ang pagkamapasalamaton kinahanglanon aron mabuhi ka nga malipayon ingon man malinawon.

Tinuod lawom na ang gabii sa akong pagpauli sa kumbento apan padayong nitingog ang messenger sa mga mensahe sa pagtimbaya gikan mga kahigalaan. Bisan pa man kun mibathay ang kawalay puangod sa mga tawong manggamitay lamang apan nipasulabi sa gihapon ang pagpasalamat gumikan sa mga grasya nga nadawat.

Ug unta ako usab mamahimong manggihatagon sa kanunay aron mahatagan og kaangayan ang gihimong kamanggihatagon sa kadaghanan.