EDITORYAL - Andam na ba ta?

Isip usa ka developing country, nagkinahanglan gyud ang Pilipinas og abundang suplay sa enerhiya sa kuryente. Ang Pilipinas usa sa mga nagsalig sa enerhiyang gigamitan og fossil fuels sama sa coal apan tungod sa aso nga gibuga niini nga nakadugang sa polusyon sa kahanginan daghang mga environmentalists ang supak sa pagdugang pa og tukod niini.

Duna untay laing alternatibong tinubdan sa enerhiya gamit ang renewable energy apan giingong mas mahal ang pagtukod niini. Sama nalang sa pagtukod og dams aron maoy mopadagan sa mga hydropower plants, geothermal energy gikan sa init nga alisngaw sa bulkan, solar power ug wind power. Duna pay daghang mga posibleng makuhaan og renewable energy dinhi sa nasud sama sa mga waterfalls, wave (bawod), ug uban pa nga pinaagi sa teknolohiya ug modernong mga desinyo makahatag gyud og kuryente.

Ang administrasyong Duterte kinsa bag-ohay pang nibisita didto sa nasud sa Russia giingong nagpinirmahay og kasabotan nga magtinabangay pagsusi sa posibleng pagbutang og floating nuclear power plants sa mga isla sa Pilipinas inay padayunon ang giingong peligroso sab nga Bataan Nuclear Power Plant nga wala mapusli.

Way kwestyon ang kaepektibo sa nuclear power plants. Tungod kay halos tanang mga nagunang mga nasud sa kalibotan duna niini ug nakatabang sa paspas nga paglambo sa ilang ekonomiya.

Apan dili sab malilong sa publiko kun unsa kadako ang epekto o kadaut nga mamugna niini sa tibuok nasud kun may usa may dautang mahitabo sama sa nahitabo sa Fukushima sa Japan pipila ka tuig na ang nakalabay ug ang makalilisang nga Chernobyl nuclear meltdown didto sa Pripyat sa Ukraine nga kaniadto sakop pa sa kanhi Union Soviet of Socialist Republic of Russia(USSR) niadtong Abril 26,1986.

Ang maong duha ka aksidente sa planta nukleyar hangtud karon nagpabilin ang kadaut ug peligro palibot sa maong mga lugar tungod sa radiation nga maka-kanser ug uban pang komplikasyon sa panglawas. Kita andam na ba ta? Maayo tingaling mas tutokan sa duha ka nasud ang renewable energy kun unsaon pagtukod nga makabarato inay nga mosugal sa floating nuclear power plant.