EDITORYAL - Sugbo makabentaha bisan nabiyaan

May bentaha gihapon ang Sugbo ilabi na ang Metro Cebu kun itandi sa Metro Manila bisan pa man og nabiyaan na kini og maayo sa mga imprastraktura sama sa modernong public transport systems.

Kini tungod kay duna pay panahon ang Metro Cebu nga malikayan nga dili maparehas sa Metro Manila nga naglabad na ang ulo tungod sa problema sa trapiko ug baha.

Kung magkahiusa lang ang tanang mga mayor, gobernador, mga kongresista ug nasudnong kagamhanan mahimong mas manindot ug hamugaway pa ang Cebu sa kaulohan.

Pagkanindot unya tan-awon sa ka-moderno sa Metro Cebu kun matinuod ang planong Integrated Intermodal System (IITS) dinhi tungod kay mausab gyud  dagway sa lugar. Ang IITS gitinguha kay gipanglantawan kining ‘long-term’ solution nunot niining nagkagrabeng problema sa trapiko sa Metro Cebu tungod sa padayong paglambo sa mga lugar niini.

Mahimong isipon nga ‘advance thinking’ sa mga nagduso niini kining IITS. Usa kini ka maayong proyekto nga wala mahunahunai “in advance” sa mga nanglabay nga mga lider sa Sugbo tungod sa panagbikil sa politika ug personal nilang mga kasungian.

Ang maong programa nagtinguha pagpatukod og LRT, BRT, mono-rail, duna pay intermodal terminals, bike lanes, cable cars ug uban pa nga pulos tanan para sa kaayohan sa mga sumasakay ug sa paghapsay sa dagan sa trapiko.

Sa pagkakaron, kinahanglang paspasan na sa mga nagpasiugda niini ang maong plano samtang may suporta pa gikan sa nasudnong kagamhanan, tungod kay pagkatinuod, nabiyaan na og maayo ang Sugbo sa Metro Manila.

Ang nakanindot niini may direksyon unya ang proyekto kay giusa ra man ang pagplano ubos sa pagpanguna mismo sa nasudnong kagamhanan ug dili iya-iya lang sa mga lokal nga mga lider.

Busa dili angay ikaguol nga “nabiyaan” na ang Cebu kay mao kini ang magtumod unya sa mga Sugboanon ngadto sa mas malambuon ug hapsay ang pagpugyo kun itandi unya sa Metro Manila.