Gikuninitan

Gitabangan sa tanang Local Government Units sulod sa ilang service area ang Metro Cebu Water District (MCWD) tungod sa dili nila maayong serbisyo.

Ang labing awahing mikondinar nila mao ang Metro Cebu Development and Coordinating Board.

Atol sa tigom sa MCDCB niadtong Biyernes gikastigo niini ang water district tungod sa matud pa kakuwang sa pagpakabana sa reklamo sa mga konsumidor. Matud sa mga sakop sa board nga usa sa hinungdan nganong di moabot ang supply sa tubig ngadto sa mga panimay mao ang busloton nilang mga tubo.

Gibana-bana sa MCDCB nga moabot og 60 mil ka litro sa tubig ang mausik tungod sa nag-leak nila nga mga tubo. Ang water district unang mipasabot nga ang usa sa dakong hinungdan sa pagkuwang sa supply sa tubig mao ang saltwater intrusion kon ang pagsulod na sa tubig sa dagat diha sa mga tinubdan.

Ang hinungdan niini mao ang over extraction o ang nanghinobra nga pagbomba sa tubig gikan sa mga tinubdan. Dugay na ko nakadungog niining maong problema.

Dugay na ang MCWD nga nagpasidaan sa kalapad na sa problema apan naglibog ko nganong hangtud karon wala pa sila makakita og permaninting solusyon niini. Ang saltwater intrusion wala mahitabo sulod lang sa usa kagabii.

Dugay nang katuigan nilang nahibaw-an nga mao ni ang sitwasyon apan unsay ilang gihimo pagsulbad sa problema sa kakuwang sa supply sa tubig? Unsa may gihimo sa mga opisyal sa MCWD aron pagpangita og alternatibong tinubdan sa tubig aron unta malikayan ang sitwasyon karon?

Sa akong tan-aw mas nalinga ang mga opisyal sa MCWD board pagpangita unsaon paglusot sa Commission on Audit aron madugangan pa ang gikolekta nilang mga benepisyo inay nga mangita og paagi pagsulbad sa kakuwangan sa supply sa tubig.

Nahinumdom ko nga niadtong tuig 2014 miabot og P108 milyones ang kantidad sa mga benepisyo ug allowances sa mga opisyal ug kawani sa MCWD ang gi-disallowed sa COA. Lakip niini ang P70.7 milyones nga corporate incentive bonus, P8.7 milyones nga rice ug hopusing allowance, P8 milyones nga medical expense allowance, P5 milyones nga school opening bonus, P4 milyones nga utility allowance, P3 milyones nga hospital bill allowance, ug P1.2 milyones nga longevity allowance.