Di manguros kun di kilatan
Ang ato rang nahibaw-an gikan sa Metro Cebu Water District (MCWD) mao nga nitidlom pag-ayo ang ilang suplay sa tubig sugod sa niaging buwan tungod sa paghunong nila pagkuha og tubig gikan sa atabay sa pribado nilang supplier sa Consolacion nga nasudlan na og dagat.
Ang wa isulti sa MCWD mao nga tinuyoan sa pribadong supplier ang nahitabo sa ilang atabay. Nagpatuyang sila og suyop sa tubig gikan sa ilawom sa yuta sud sa daghang katuigan bisan sa pasidaan nga nalapas na nila ang kinutoban. Ug busa mas paspas nga nitidlom ang groundwater ug gipulihan sa dagat.
* * *
Napugos ang MCWD pagputol sa kontrata sa pribadong supplier bisan na-ibanan og 7,000 cu. m. nga suplay sa tubig matag adlaw ang ilang mga konsumidor sa Consolacion ug Mandaue City. Nabalaka sila nga ang iresponsableng supplier padayong mag-abuso ug masanapan sa dagat ang tibuok groundwater system sa Consolacion, Mandaue ug Liloan.
Tungod sa pagkabasura sa ilang kontrata sa MCWD, napugos ang pribadong supplier pagtak-op sa ilang atabay. Gawas kun makakita sila og mga konsumidor nga mopiyong lang sa ilang pagpanamastamas sa kinaiyahan.
* * *
Way gahom ang MCWD pagsilot sa pribadong supplier, gawas sa pagputol sa ilang kontrata.
Ang responsibilidad sa pagbadlong sa kanahan nga suppliers iya sa National Water Resources Board (NWRB).
Nga bisan may buhatan na dinhi sa Sugbo napamatud-an, pinasikad sa kalapasan sa supplier sa MCWD, nga wa gihapon makatuman sa ilang tahas.
Makatabang hinuon kun ang lokal nga mga opisyal sa Consolacion, atubangan sa pagpangiyugpos sa NWRB, mohimo sa ilang bahin pinaagi sa pagbakwi sa mga permiso sa iresponsableng suppliers sa tubig.
* * *
Sa pikas nga bahin, kun magpadayon ang ka-inutil sa NWRB ug local government units (LGUs), ang nahitabo sa Consolacion mahimong mahitabo sab sa ubang mga dakbayan ug kalungsoran nga duna pa untay groundwater.
Nag-una nang Cebu City nga ang dagat nga kutob ra unta sa Sanciangko duol sa downtown area pipila ka dekada ang nilabay karon niabot na sa ibabaw nga mga barangay sa Guadalupe ug Talamban.
Sama sa naandan, mahimong unya na ta makamatngon kun uwahi na ang tanan. Sa sulti pa sa atong katiguwangan, di ta manguros kun di kilatan.
* * *
- Latest
