Kulban sa panginabuhian

Nagpatabang sa city hall ang mga sidewalk vendors nga makulban sa kaldero kong ipatuman na ang clearing operation sa syudad sa Sugbo.

Kini nunot sa direktiba sa Department of Interior and Local Government (DILG) nga hawanan ang tanang nakaali sa mga agianan.

Moabot sa 700 ka mga vendors ang maapektohan sa kamandoan sa nasudnong kagamhanan.

Asa naman lang kuno sila manguha og ikabuhi sa ilang pamilya, pagpaeskwela sa ilang mga anak.

Ang pagpanginabuhi sa sidewalk giisip nilang tinarong nga maoy tinubdan sa tanan nilang panginahanglan.

Gipadayag nila nga wala man sila makasamok sanglit wala man nila okupahi ang karsada diin diha ra man kuno sila sa gamayng luna atbang sa mga establisemento.

Busa nangaliyupo gyud intawon sila nga mahatagan og pagsabot sa ilang kahimtang kay susama kuno sila sa masakiton nga aduna nay tagal ang kinabuhi hangtod kanus-a moginhawa.

Si kanhi konsehal Joey Daluz, sinaligan ni Mayor Edgardo Labella ang nakig-atubang sa mga vendors atol sa gipahigayong meeting.

Matod ni Daluz nga nakisimpatiya sila sa sitwasyon sa mga maapektohang vendors busa moapelar sila nga pagpabilin kanila sa mga pwesto sa aseras basta dili lang makabalda sa publiko.

Sumala ni Daluz nga dili ang mga sidewalk vendors ang nakasamok sa mga karsada kundili ang mga sakyanan nga nagparking nga illegal daplin sa kadalanam.

Mao unta kini ang tutokan sa mga otoridad nga hawanan ug dili ang mga nanginabuhi.

Hinoon dunay gilantaw nga luna ang dakbayan nga pahilunaan sa mga vendors kun madayon ang clearing operation ug dili na sila patindahon sa sidewalk.

Apan ang kabalaka sa mga vendors kun makalahutay ba sila ilabi na kon walay mga mamalit sa ilang tinda.

Sa mga palisiya nga ingon niini ang mga kabus gyud ang kanunay’ng pildi.