Luha sa kahadlok napapas

Gimingaw ko og kao’ng seafoods sa miaging Martes, Septiyembre 10. Mao nga midalikyat ko’g adto sa kanhi suki kong gamayng tindahan nga anaa mahimutang duol sa PLDT ug sa Cebu City Police Office (CPPO) diha sa may Osmeña Boulevard ning dakbayan.

Nakalitan ko. Kay dili na man ang babayeng tag-iya ang nanakos sa mga sud-an. Usa na man ka batan-ong lalaki, kinsa ingon sa kiwaw pang moserbisyo ngadto sa ilang mga kustomer, kinsa sagad mga polis.

Pag-ukab ko sa duha ka kalderong gi-display, tinolang isda ug linarang ubod pa ang naluto. Ug kay gutom na man, kini na lay akong giorder.

Igo ko nahuma’g kaon, nakit-an ko sa babayeng tag-iya, kinsa daling milingkod sa akong nahimutangan. “Hala, Sir, daot na lagi ka kaayo. Ngano man?”

Gitug-anan ko siya sa naglarayng mahalong sakit nga maoy hinungdang bag-o lang kong nakagawas sa ospital. Kalit lang, nakahilak siya. Diay, na-relate niya ang nahitabo sa iyang anak lalaki, kinsa na-diagnose nga may colon cancer, bukog ug panit na lang nga na-admit sa ospital ug nagkinahanglang operahan.

Ang problema kon asa siya’g ibayad? Gani, inangkat man tanan ang gipuhonan niya sa pagpaninda.  Busa, nag-ampo ug gisalig na lang niya tanan sa Ginoo.

Ug nahibulong na lang siya nganong daghang tawo nga wala siya makaila ang mitunol niya sa maong panginahanglan. Ultimo, si Dr. Tan, kinsa maoy surgeon, bisan usa ka sentimo, wala gyod magpabayad. Igo na alang sa doktor nga successful ang operasyon ug nakabalik ang bata sa  pag-eskuyla.

Giingnan ko akong suki: “Ingon ana kamanggiluy-on ang Ginoo. Pangayo kay hatagan ka  Niya. Gipasinati ka Niya niini kay bisag busy ka sa inadlawng kapanginabuhian, isirado gyod nimo ang inyong tindahan kada Domingo ug mosimba aron magpasalamat ug makig-istorya Kaniya.

Busa, ipadayon kini. Kay the more nga magpaduol ka sa Ginoo, the more nga makaila ka Niya.”

Ug moabot ang higayon, nga sama nako, samtang natulog, gikantahan sa mga anghel og: ‘The Lord is my Shepherd, there is nothing I shall want.”

Mituang ang pagbuhagay sa iyang mga luha sa kahadlok. Ug mipuli ang kasanag sa iyang panagway nunot ang pag-ingon: “Sir, salamat sa espirituhanong mensahe nga imong gipaambit nako.”