Duaw banay

Kini maoy akong gitinguha nga mahitabo dinhi sa among parokya ni San Jose sa Madridejos, Alegria. Matag adlaw nga Miyerkules ug Domingo sa gabii ako gyung gigahin sa pagduaw sa mga pamilya nga sakop sa akong parokya. Kuyog sa Divine Mercy Ecclesial Community among gihimo ang pagduaw sa pamilya, paghilog sa mga masakiton ingon man ang pagpakumpisal sa mga sakop sa pamilya kun ugaling ganahan sila.

Inig ka Domingo kining maong mga pamilyaha gidapit namo nga mosimba sa mga Misa diin sila mismo ang mohalad kuyog sa ubang mga manimbahay. Sa maong kasinatian daghan ko og nakat-onan.

1. Una mas masayran nimo ang panginahanglan sa imong katawhan panahon sa nahitabong kukabildo ug padayganay sa mga panahom.

2. Ikaduha mas modaghan ang imong mga higala ug mamahimong mabulokon ang imong kinabuhi kaysa magpuyo diha sa pag-inusara.

3. Ang maong pagsuroy wala makabalda sa pag-inusara sanglit may panahon ang matag higayon. Panahon sa pagpakahilom, panahon sa pagtingog. Panahon sa pag-inusara, panahon sa pagsagol.

4. Ikaupat ang kinabuhi sa parokya kinabuhi sa pakigsandurot. Ang imong pagkaabli sa mga kahigayonan sa pagpangalagad dako kaayo og kahimoan aron sa ingon mamahimong mas mabulokon ang matag gutlo sa atong pakigsandurot.

5. Dili kini mahitungod sa pagkaon o mahitungod sa bisan unsay mahatag kondili mahitungod kini sa pakigbayloay sa mga maayong butang ug kasinatian uban sa lamdag sa Diosnong pag-amoma ug tawhanong kaayohan.

Hinaut pa unta nga kini mapadayon ug sa pagpadayon ning mga butanga makita ko unta sa mas suod pa nga paagi ang presensiya sa Dios pinaagi kanila. Nahinumdom nuon ko sa awit nga nagkanayon: “We are One Body, One People! United we Stand, Divided we Fall!” Mao nga buhata kun unsay makaayo ug makalipay sa imong isigkaingon ug seguro kita nga malipay ang Ginoo ning tanan.