EDITORYAL - Solusyon pagpakgang sa maghikog?

May gihimo nang pamaagi ang Mactan-Cebu Bridge Management Board bahin niining sagunson nga mga hitabo sa paghikog diha sa duha ka mga taytayang nagkonektar sa mainland Cebu ug Lapu-Lapu City.

Usa niini ang pagbutang lang og usa ka pedestrian lane ug pagpasirado niini gikan ala-una sa kaadlawon hangtud sa alas-5 sa buntag. Maayong paminawon apan dili tanan uyon ang publiko nga nipadayag og pagsupak pinaagi sa social media.

Apan kining pagdili sa mga bisekleta nga makaagi sa taytayan, murag kinahanglan kining tun-an og maayo. Mura man gud ni og anti-poor.

Klaruhon unta kun dili na ba gyud paagian o pasudlan? O makaagi gihapon ang magdala og bisekleta basta dili nila sakyan samtang nagtabok pa sila sa maong taytayan.

Tinuod nga kining mga magbisekleta nga mosaka diha makahasol gyud sa mga motorista kay hinay ilang dagan pagsaka ug kuyaw kaayong masaghiran ilabi na kun padulhog na.

Apan dili tanang mga magbisekleta nga motabok sa taytayan pang-exercise lang ang tumong. Dunay uban nga magbisekleta aron makadaginot sa ilang pletihan.

Maayo man ning mga sakop sa board pulos man ni sila de sakyanan, unya unsaon naman lang ang mga nanarbaho nga magtabok-tabok sa taytayan gamit ang bisekleta padung sa ilang mga trabahoan?

Gitan-aw ba ni sa board? Ang mga naghikog nagbisekleta ba diay?

Karong tuiga lang upat ka mga paghikog ang nahitabo diha, samtang dunay duha nga napugngan sukad nga gibutangan og mga polis.

Ang pagsira sa usa ka lane para pedestrian, pagsira niini sa kaadlawon ug ang pagdili sa bisekleta mao ray mahimo sa board isip pisikal nga pamaagi pagpakgang sa mga gustong maghikog gamit ang taytayan.

Apan sa pagbuhat niini, dunay maapektahang nagkinahanglan sa maong taytayan.

Ang mga batid sa pangisip miingon nga depresyon maoy nagtukmod sa tawo aron maghunos sa kinabuhi. Ang pamilya maoy dunay dakong papel nga mapakgang kini.