Mga patama nga wali

Gisaulog sa usa ka lungsod ang pangilin sa ilang balaang patron. Daghan ang mga dumuduong ingon man ang mga politiko ug inilang mga tawo sa lungsod. Anaa pud niabot ang mga tawo sa nagkalainlaing dapit aron moduaw ug motambong sa pagahimoong misa pontifical.

Sa dihang gihimo na ang sermon gipahimug-atan sa walidor ang mahitungod sa pangawat diin gihimong sanglitanan ingon nga karakter ang usa ka pamunoang lungsod. Human sa misa ang mayor niduol dungan ang paghatag sa iyang donasyon uban ang katapusang tugon: “Nia ang among tampo ug hinumdomi dili kini kinawat!”

Ang mga tawo usahay nahimong far sighted kaayo kun maghisgot kita og sala. Ang atong makita sala ra gyud sa ubang tawo ug nahikalimot kita nga kita mismo dunay atong kaugalingong mga sala.

Dili lang kini mahitungod sa kun asa kita nibarog kondili mahitungod kini kun angayan ba natong basulon ang usag-usa.

Kinsa man gyud ang angayang basulon ang anaa ba sa pangagamhanan o kita ba mismo nga anaa sa hawananong sagrado? Kay mosugot ta o sa dili kada usa nato dunay kaugalingong tampo sa pagkagusbat sa atong katilingban.

Kada usa nato nahimong dunay nahatag labina kun maghisgot kita og pagkatun-as sa moralidad nga kasagaran atong ipahid sa yawa nga maoy nitintal nato.

Matag usa nato dunay tampo diha sa pagkagun-ob sa tawhanong katungod nga mismo ang nisangyaw sa bili sa pagkamakiangayon ang dili gani maantigong mohatag sa hustong suhol tungod sa hustong buhat. Sa atong panaw ning kinabuhi, kun magka edad na ang tawo nahimo naman hinuon siyang mas ligdong pa kay ni bisan kinsang pariseo.

Mahimong ipaagi lamang sa pasiaw ang tanan natong paghukngay apan sa dili pa kita mopasiaw niini basin baya og nahimong nisibaw ug nibagting sa atong panumdoman ang mga kalapasan nga atong nahimo kaniadto pa.

Walay nigukod kay nahadlok silotan sa Diosnon nga gahum apan kun buot hunahunaon ang matag anib sa tawhanong kasaysayan nibutyag man sa buhing matuod nga bisan gani ang mga giisip natong mga balaan nahimong samdan sa tawhanong kahuyangan.

Samtang giusap ang pagkaon ug gitungab ang tanlas nga bino sa hagukang pagsaulog sa atong kapakyasan sa pag-usab sa atong kaugalingon alang sa kaayohan, napatik ang tinguha nga mamahimong santos taliwala sa mga paglutos.

Ang panapus mao nga atong himoon ang pagtinabangay aron kitang tanan mahiagom sa saad nga gitawag nilang kaluwasan.