Mga tinuod nga gahum

Nag-alindasay ko niadtong gabhiona sa dihang daw dunay laing presensiya nga naglaaglaag sulod sa nataran sa kumbento ni Otik. Sa laktod daw eerie kaayo ang pamati sa matag usa.

Mao nga nakahukom na lang ko nga mohimo og pag-ampo ug linain nga panalangin ning halawom nga gabii sa pagtuo nga mamahimong makapahulay ang matag tawo.

Tuod man, ang kahadlok napulihan og kalinaw ug pagtuo nga ang Ginoo mobantay ug manalipod kanamo gikan sa gahum sa dautan.

Nahinumdom nuon ko sa giingnon nilang Fr. Syquia kaniadto nga gikinahanglang dili kita mahadlok sa binuhat lamang sa Dios mas angay natong kahadlokan ang Dios mismo.

Ang buot ipasabot niya mao man ang mga rebellious angels nga gipangulohan ni Lucifer kun Satanas.

Di ta angay mahadlok niya kay bisan pa man kun siya superior ug gahum kanato kay siya espiritu apan mas angayan natong kahadlokan ang Dios nga mahimong makasugnod sa matag kalag sa impiyerno.

Sa laing bahin, ang maong kasinatian nipahinumdom kanako nga bililhon gyud diay ang pag-ampo bisan pa man kun wa kitay dakong panginahanglan man o wala.

Ang pag-ampo baya kun buot hunahunaon pagpadayag man sa atong pagkamapasalamaton gumikan sa mga butang ug panalangin nga gibubuo sa kahitas-an ngari kanato.

Ang tinuod nga gahum wala diha sa mahasiong pagbanhig sa dautan matawo man o espiritu kondili ang tinuod nga gahum nagasukad man diha sa atong mapaubsanon apan masaligong pag-asdang sa gahum nga yawan-on diha sa atong kinabuhi.

Mga pag-asdang nga dili magsapayan sa mga posibliing mahitabo. Mao nga sukol lang sa gihapon kay kun buot hunahunaon kining maong Espirituhanong Pakigbisog, gubat kini sa Dios ug dili nato. G

idapit lamang kita nga manginlabot segun sa atong mahimo ug pinasikad sa grasyang langitnon.

Sa akong pagnaug sa pikas lawak natingala ko nganong dunay duha ka mga sako nga nagbarog ug sa akong pagsud-ong niini anaa ang mga tawhanong bukog.

Nakaingon ko nga basin ang tag-iya ning mga bukoga ang nitiyabaw kay wala sila mahatagi og igong kapahulayan. Ako nakahukom nga sila akong bendisyonan ug sa sam-ang papahulayon na uban sa mga misa ug pag-ampo. Kay gigamit aron sila matagad ug sa maong pagtagad sila matabangan.