Gisuklan ang kamatayon

Laing pagpang ambush na usab ang nahitabo sa mga tawo nga gikan mitambong sa hearing sa Hall of Justice sa Qimonda building North Reclamation Area ning dakbayan sa Sugbo.

Ang latest ang pagbanhig mao ang nahitabo kang Atty. Inocencio Dela Cerna, usa sa mga abogadong de kampanilya.

Gikan sa hearing ang abogado dihang giatangan sa gun man sa gawas sa Qimonda building.

Napusilan na ang iyang sakyanan apan wala makaigo kaniya hinungdan nga mipabulhot siya sa pagpadagan apan gisundan gihapon.

Hangtod nga naabot ang abogado sa dapit nga wala nay kapilian kon dili ang pagharong sa mga suspek nga riding-in-tandem.

Nakapabuto sa iyang armas ang abogado apan wala niya maigo ang mga assailant kinsa nakasibat.

Mga samad pinisik sa buak nga bildo ang naangkon sa biktima kinsa wala na magpadala sa hospital.

Sa siyam ka buslot sa sakyanan ni Dela Cerna daw dili gyud maluwas ang naa sa sulod niini.  Ambot giunsa sa abogado nga mitipas ang mga bala ug wala motugpa sa iyang lawas.

Kun ang uban pa ang pasultihon, basin naay ‘panipas nga anting-anting’ ang abogado, bitaw swerte lang gyud nga wala molampos ang mga kriminal, seguradong niadtong tungora anaa sa iyang kiliran ang anghel dela gwardiya ni Dela Cerna nga maoy misagang sa bala.

Gisubay pa sa kapolisan ang tanang anggulo sa krimen diin dakong posibilidad ang mga high profile cases nga gihuptan niini.

Samtang nasubo si RTC-7 Executive Judge Macaundas Hadji Rasul nga mga nahitabo sa mga tawong naggikan sa ilang building nga maoy target sa pagpatay.

Busa nanawagan siya sa mga otoridad nga butangan og mga pulis ang palibot sa Hall of Justice nga maoy nahitabo karon.

Kung naay mga men in uniform magpanagana ang mga kriminal nga mohimo sa krimen o madakpan ug mailhan.

Maayo gani kay nabuntog sa abogado ang kamatayon dihang nakahukom siya sa pagsukol.