Ayaw paghilak

Nisud ko sa usa ka kan-anan aron mokaon, sa dihang daw sa alingisig kaayo ang tingog nga misibaw gikan sa akong luyong bahin. Sa akong paglingi usa ka bata ang nisiyagit taman sa ginhawa ambot lang kaha kun unsay hinungdan sa maong paghilak.

Tingali wa kauyon sa sud-an niyang Chicken Spicy o dili ba kaha nangita og gatas o alimuot ba kaha ang palibot o laksot ang mga tawo mao nga ang bata naglagot. Naluoy ko sa mama nga sa akong tan-aw batan-on pa.

Asa kaha ang papa ning bataa nganong sa pagpanuroy sila raman duha. Ang ubang mga kustomer nairita sa til-is nga tingog ning bataa. Ako nga wa kaagwanta miduol kaniya. Sa daklit nihilom siya ug akong gituyo nga akong himoong kenkoy ang nawong kong kunot. Sa hinay nibathay ang pahiyom sa iyang bata nga panagway.

Mura ko og papa nga mihagwa kaniya samtang nagtan-aw ang iyang mama. Mapahiyumon usab kining nisud-ong sa mga panghitabo sa iyang palibot. Nahilom ang bata ug nibalik ko sa akong gilingkuran sa dihang natino ko nga maayo na ang iyang pamati.

Lisud baya gyud ning moatiman og kabataan ilabi na sa mga higayon nga sila dunay gihambing balatian. Apan matud pa nila kun dunay mga matang sa tawo nga imong suoron ang mga tiguwang kuno ug mga mga kabataan. Ang mga tiguwang maghatag kanimo og daghang pagtulon-an samtang ang kabataan maghatag kanimo og kalingawan gikan sa stressful kaayo nga kinabuhi.

Mao tingali ni ang rason kun nganong hilig kaayo ko og bata bisan wa koy ako. Ang mga bata alang kanako bahandi nga angayang atimanon. Sila ang ehemplo nga gilatid ni Hesu Kristo kanila nga buot mosulod sa gingharian. Kun buot nimong mamahimong labaw pagpakasama sa usa ka bata. Wala lang tuyoa dunay nikuhit sa akong abaga samtang nagkalingaw ko og usap sa carbonara nga lata lata. Sa akong paglingi ang mama diay sa bata nga mapahiyumong mihangyo: “Unsay imong number kuya?” Sa akong kaugalingon ako nakaingon: “May bata nakong nahagwa! May mama pa nga nakaila!”