Kanihit sa kasayuran
Ang maayong balita mao nga luwas pa sa African Swine Flu (ASF) ang Cebu City ug ang Pilipinas. Pulos nipasalig silang Cebu City Veterinarian Jennifer Laurente ug Agriculture Secretary William Dar nga di ASF ang namatyan sa mga baboy sa bukirang barangay sa Lusaran ug sa Rodriguez, Rizal.
Ang di maayong balita mao nga wa kahibawo si Laurente unsa ang hinungdan sa pagkamatay sa tulo ka baboy sa Lusaran ug si Dar nagdumili pagtug-an unsay tinuod nga sakit sa mga baboy sa Rizal tungod sa kabalaka nga ma-alarma ang publiko.
* * *
Si Dar ang nipahibawo nga ang resulta sa laboratory test sa blood samples sa nangamatay nga mga baboy sa Rizal mahibaw-an human sa tulo ka semana ug ang resulta sa confirmatory tests sa mga laboratoryo sa ubang kanasuran mahibaw-an human sa tulo ka buwan.
Ambot nganong wa pa gani mahuman ang laboratory tests gisalikway na nilang Dar ug Laurente ang ASF.
Si Laurente niingon nga wa siyay nakitang timaan sa ASF—labhag sa panit labi na sa may dunggan—apan si Dar kumbinsido nga mas ma-alarma ang publiko kon moluwat siyag dugang kasayuran.
* * *
Laing gipasikaran sa pasalig ni Laurente nga luwas pa sa ASF ang dakbayan mao nga wa mangamatay ang ubang mga baboy sa samang nataran sa Lusaran.
Kay segun sa World Health Organization (WHO) ang kagaw sa ASF paspas nga motakod ug mopatay sa ubang mga baboy.
Apan sa pagpatin-aw unsay namatyan sa tulo ka baboy si Laurente igo lang nidason sa pangagpas ni Cebu City Agriculturist Joelito Baclayon nga mahimong tungod sa kahugaw, kakuwang nutrisyon ug food supplements ug kahimtang sa panahon.
* * *
Mas kahibulongan ang postura ni Dar. Samtang nipasalig nga di ASF ang nakapatay sa mga baboy sa Rizal, nga ang gidaghanon di sab niya ibutyag, gipatuman ang mga lagda sa pagpugong sa pagkatap sa mananakod nga sakit:
• Gipapatay ang tanang baboy sud sa usa ka kilometro nga radius;
• Gipakuhaan og blood samples ang tanang baboy sud sa pito ka kilometro nga radius; ug
• Gitanggong ang tanang baboy sud sa 10 ka kilometro nga radius ug gimandoan ang tanang babuyan sa pagtaho sa kahimtang sa panglawas sa ilang mga baboy.
* * *
- Latest
