EDITORYAL - Oras para sa pamilya, pahuway

Ang edukasyon mahinungdanon kaayo para sa kabataan kay kini maoy ilang magamit sa tibuok nilang kinabuhi, mao nga ang gobiyerno dunay libreng edukasyon para sa tanang kabataang Pilipino.

Ang mga magtutudlo maoy ikaduhang ginikanan sa mga bata ug sila maoy mopalig-on ug mopuno sa mga maayong gawi nga gitudlo na sa mga ginikanan ngadto sa ilang mga anak.

Apil na niini ang paghigugma sa ilang pamilya ug sa nasud ug pagbaton og maayong panglawas sa tanang oras.

Apan unsaon man kun tungod sa mga homeworks ug assignments wa nay oras ang mga bata sa ilang pamilya, kaugalingon, mga higala ug pahuway?

Maayo lang og usa ka assignment, unsaon nalang og dunay duha ngadto sa tulo o upat ka mga subjects ang dunay gipabuhat nga assignment? Maayo pa kaha kini sa mga bata?

Way oras para sa pamilya unya wala pa gyuy saktong pahuway kay magpulaw paghimo sa mga assignments?

May duha ka balaudnon diha sa Ubos Balaybalauranan nga “No Homework Policy” para sa mga kindergarten hangtud high school.

Sila si Quezon City Rep. Alfred Vargas ug House Deputy Speaker Evelina Escudero  nagtuong mas maayong kalidad sa kabataan ang mahimo sa nasud kun balanse ang edukasyon ug oras para sa pamilya ug saktong pahuway.

Ang House Bill No. 3611 ni Escudero gusto sab nga ipabilin ang mga libro sa mga bata diha sa ilang mga eskuylahan aron wala na silay hunahunaon kondili ang makauban ilang pamilya human sa klase.

Samtang ang House Bill No. 3883 usab ni Vargas may pagkaparehas sab kang Escudero apan buot niyang dili padad-on og homework o assignment ang mga bata para sa adlaw nga Sabado ug Domingo.

Debatihonon pa kini sa Kongreso apan kung unsay makaayo sa mga kabataang Pilipino angay gyud suportahan.