Kalibog sa buwang
May duha ka posibleng hinungdan nganong hangtod karon wa pa makapasaka ang kapolisan og kaso batok sa mga tag-iya sa buwangan nga gipanag-iya sa pamilya ni Mandaue City Mayor Jonas Cortes:
Mahimong naikog ang kadagkoan sa Criminal Investigation and Detection Group (CIDG) nga maoy nagronda sa D & C Coliseum sa Mandaue niadtong Agosto 5 ning tuiga sa mayor nga maoy gipaluyohan ni Presidente Rodrigo Duterte sa niaging piniliay; o
Naglibog ang mga polis kon epektibo pa bang 45 anyos nang balaod ni anhing Presidente Ferdinand Marcos (PD 449).
* * *
Abunda ang sukaranan sa unang pagduda. Kay kon unsa kapaspas sa CIDG Mandaue sa pagtanggong ug pagkiha sa dul-an sa 400 nga naabtan sud sa buwangan atol sa ronda, bisan sa ka wa nilay igong prisohan, pagkaon ug pansayan sa mga dinakpan, mao sab sila kaluya sa pagtandog sa pamilya sa mayor.
Gani, hangtod sa akong pagsuwat ini, wa pa ilha sa mga imbestigdor kinsa ang mga igsuon sa mayor nga nanag-iya sa buwangan ug wa pa isulti kanus-a sila pasakaan og kaso ug unsa ang mga kaso nga ipasaka.
* * *
Ang posibleng kalibog sa mga polis mahimong nanukad sa upat na ka balaod nga gituohang niusab sa PD 449 (Cockfighting Law sa 1974):
PD 1802 (nitukod sa Philippine Gamefowl Commission niadtong Enero 16, 1981);
PD 1802-A (giluwatan sa samang adlaw apan nitugyan sa pagduma sa mga buwangan ngadto sa local government units); ug
Local Government Code sa 1983, Batas Pambansa 337 ni Marcos, ug Local Government Code sa 1992 (nga pulos nidason sa PD 1802-A).
* * *
Samtang nitataw ang pipila ka tag-iya sa mga buwangan nga napapas nang PD 449 ug angayng ipatigbabaw ang mas bag-o nga mga balaod, may nahibilin nga problema alang sa mga abogado sa CIDG: Ang upat ka balaod nga nalista sa ibabaw wa maghisgot nga gibasura na ang tanang probisyon sa PD 449.
Sa ato pa, mahimo nga ang lokal nga mga mayor ug mga konsehal na ang nagduma sa mga buwangan kay napapas na mang Philippine Constabulary (PC). Apan mapugos gihapon sila sa pagtuman sa lagda sa PD 449 nga mapahigayon lang ang mga buwang sa Dominggo, piyesta ug holidays.
* * *
- Latest
