Dili ko makapaabot ug dili ko buot paaboton

Kini ang giingon ni Sir sa dihang wala pa sugdi ang kalihukan. Nakadayeg ko dako uyamot kaniya sa iyang kapintok ug sa iyang kaprangka.

Hinuon makita man pud gud sa buhat ang iyang dakong tinguha nga siya ang ma on time diha sa tanan niyang pagabuhaton.

Kay alang kaniya ang tawo nga matinahuron ang mogahin gyud og igong panahon diha sa pagtahud sa uban.

Ang pagpaabot usahay lisud labina kun kita mismo duna pay daghang mga buluhaton.

Mao nga diha sa paghimo sa hustong mga lakang aron dili ma late usa ka pagpakita nga duna kitay pagtagad nga ang uban sama nato dunay mga trabaho pud nga pagaapason.

* * *

Uban kanila

Buot natong mohatag sa mga nagkinahanglan diha sa kadalanan. Apan sa atong paghatag daw nagmapasigarbuhon kita sanglit nahimo kitang mga bayani gumikan sa atong binuhatan.

Apan diha diay sa atong paghatag ug pagtabang may nakat-onan kita.

Kini ang pagkaamgo nga bisan kita nakahatag kita pud diay nagkinahanglan.

Dili hinuon sa mga butang materyal kondili usab sa mga kahigayonan nga mamahimo kitang malipay sa tinud-anay gayud sa matag higayon nga duna kitay mahimo alang sa uban.

Ning paagiha makaamgo kita nga dili sa tanang higayon ang pagkabayani nagkahulogan og bentaha diha sa pagbuhat og maayo kondili sa kahigayonan nga ang kasinatian nagtudlo kanato nga ang kinabuhi diay nindot.