Positive discipline sa mga estudyante

Gipanghimug-atan sa Department of Education ang pagpatuman sa wholistic approach kalabot sa pag amoma sa mga tinon-an.

Kini ang pagmatoto sa mga tinon-an pinaagi sa pagpakita sa mga magtutudlo sa ilang compassion o kasing kasing ug halapad nga pagsabot sa mga tinon-an aron makuha ang kabubot-on niini nga magtinarong.

Sa inato nga pagkaestorya ulog ulogan ang mga estudyante o reverse psychology ang gamiton inay pahamtangan og bug-at nga silo o pakauwawan.

Sa ingon niini nga pamaagi mosalig ang bata sa mga magtutudlo og mahaduol ang ilang pagbati ug mohimo sa mga gimbuhaton nga luag kaayo sa ilang buot.

Matud sa Deped nga wala na kadtong panahon kaniadto nga magdala og stick ang mga magtutudlo kay ibunal sa mga tinon-an nga magpabadlong.

Gitinguha nila nga mapapas na ang imahen sa mga magtutudlo nga kahadlokam sa mga estudyante kay hilabihan ka terror. Nasuta sa ahensya nga malisang o ma-trauma ang mga bata kon ingon niini ang himoon sa mga magtutudlo nga makaapekto na hinoon sa development ilabi na nga naa pa sila sa formative years.

Tinuod gyud kay ako mismo biktima sa ka terror sa akong maestra sa elementarya nga hangtod karon madamgohan pa nako siya.

Matud sa opisyal sa DepEd nga gidili gyud ang pagpakauwaw sa mga tinun-an sama sa pagpatindog sa classroom kun dili makatubag sa pangutana.

Samtang labaw nga gipahimangno sa Deped sa mga magtutudlo nga tan awon ang safety sa mga tinun-an.

Kutob sa mahimo sulod lang sa school campus ang mga activities kun duna may gikinahanglan nga himoon.

Ugaling naay gikinahanglan nga mogawas sa campus gikinahanglan nga adunay pagtugot sa eskwelahan ug naay parental consent.

Maayo man ang tumong sa mga magtutudlo nga i develop ang independence sa mga tinun-an ug ang ilang katakos apan gikinahanglan tanawon ug seguradohon nga mapanalipdan ang ilang mga tinun-an gikan sa posibleng mahitabo.