Mag-estrikto ta

Unsay ikasulti ninyo niining sugyot ni Cebu City Councilor Lea Japson nga i-revoke ang mga driver’s licenses niadtong mga motorista nga madakpan sa paghimo og reckless driving?

Giduso ni Konsehal Japson sa Cebu City Council ang iyang resolusyon nga nag-awhag sa Land Transportation Office (LTO) nga kinahanglang rebokahon gyud ang mga lisensya sa mga abusadong driver.

Lakip sa mga reckless driving mao ang pagsugat sa agianan nga para na unta sa mga sakyanan nga anaa sa pikas nga lane, sa ato pa kadtong mo-counterflow.

Ang uban nga makahimo og reckless driving mao kadtong dili mopatuo og traffic signs nga bisan og ang karsada “No Entry,” kay one-way, mosulod gihapon.

Pananglit stop na ang signal sa traffic lights, hala, mobulhot gihapon.

Bisan og No left turn ug no right turn samtang stop ang signal, moliko gihapon. Mao kana ang gitawag og mga “moving violations.”  

Ang gipasabot sa “moving violations” nga gituyo sa driver kay nganong mosulod man siya og No Entry? Nganong moliko man siya nga bisan og may sign nga “No Right Turn on Stop Signal?”  

Ambot kun hatagan ba kaha og gibug-aton sa LTO ang awhag ni Lacson nga i-revoke ang lisensya sa mga madakpan sa reckless driving. Bana-bana nako, dili kini tumanon.

Apan bisan pa og dili revocation sa lisensya ang silot sa makahimo og reckless driving, dako ang multa niini. Kadtong deputized agent pa ko sa LTO kaniadto, kusog kaayo ko nga manakop sa mohimo og moving violations.

* * *

Nalipay ko kay giawhag ni Konsehal Philip Zafra ang CITOM nga tan-awon ang mga gagmay nga karsada dinhi sa siyudad nga adunay “pay parking” kinahanglang sutaon kun angay pa ba kining ipadayon.

Paminaw nako nakasabot si Konsehal sa akong gipasabot kaniya nga usa ka nindot kaayong paagi ang pagwagtang sa Pay Parking diha sa pipila ka mga karsada, sama sa Manalili Street.

Tinuod, makakuwarta ang siyudad gikan sa koleksyon gikan sa mga tag-iya og sakyanan nga moparking daplin sa karsada. Apan hain man ang atong palabihon, ang kuwarta o mapahapsay ang dagan sa mga sakyanan?

Bahala na ang mga motorista nga mangita og dapit nga kaparkingan sa ilang sakyanan.

Dili na kana problema sa kagamhanan kun wala sila’y kaparkingan.

Usa ko sa dunay sakyanan, apan pabor ko nga idili na sa hingpit ang pagparking diha sa mga “busy” kaayo nga karsada. Unya, estriktuhon gyud nga ang usa ka balay-patigayon kinahanglang may parking para sa iyang mga kawani ug mga kustomer.

Uyon ba kamo niini? Ipadala ang inyong mga komentaryo sa akong e-mail, [email protected]