Kagawasan sa pagginhawa

Dugay nang suliran sa mga molupyo sa Barangay Kalunasan sa Cebu City ang baho nga naghamok sa dili lang sa ilang mga ilong kon dili sa ilang panglawas.

Naggikan kini sa duha ka mga jail facility nga nahimutang sa ilang dapit kansang mga septic tank puno na og ipadagayday ang hugaw nga gikan sa sulod niini.

Idungan kuno sa pagpagawas ilabi na kon mag-ulan aron dili kaayo mabisto ang pag-agas sa hugaw sa mga tawo.

Ang hugaw mabanlas sa tubig ngadto sa sapa nga mao usay matamak tamakan sa mga tawo.

Gani bisan og dili ting-ulan mangalisbo gyud ang baho nga manuhotsuhot sa kahiladman sa mga tawo nga makasimhot niini.

Niadtong nakalabayng mga buwan atol sa gipahigayong misa sa langub sa Guadalupe duna kunoy nalipong nga misimba tungod sa ka baho nga mialingasaw.

Ang pari ug ang mga tawo nagtabon og mga panyo sa ilang ilong hangtod nahuman ang misa.

Karon posibleng masolusyonan na ang naasoy nga suliran tungod kay niaksyon naman ang dakbayan sa Sugbo.

Pinaagi sa resolution ni konsehal Nestor Archival nga giaprobahan sa konseho gideklarar ang Kalunasan ubos sa state of calamity.

Tungod niini duna nay pundong salapi gikan sa disaster funds nga magamit aron masolusyonan ang problema.

Unta mahatagan og hingpit nga kasolbaran ang problema aron makaginhawa na intawon og tarong ang mga molopyo sa baranggay Kalunasan.

Lisod baya kaayo nga mawagtangan ta og kagawasan sa atong pag ginhawa o pinugngan nga pag ginhawa tungod sa baho nga naghatag og kalbaryo sa atong kinabuhi. Mas maayo moginhawa nga dili magsampong og bisan unsa sa atong ilong.