EDITORYAL - Taras sa mga drayber usa sa problema

Ang paghuot sa trapiko nakahatag og dakong kahasol dili lang sa mga motorista kondili hasta na pud sa mga negosyanteng nagdala og mga produkto sa nagkadaiyang dapit.

Ang Cebu City maoy nag-una sa ekonomiya itandi sa ubang mga siyudad dinhi sa probinsya sa Sugbo. Apan ang Cebu City biya kaayo sa modernong traffic system. Daghan na sa traffic lights niini ang wala na mosiga o dili na magamit. Hinungdan nga diha kanunay dunay mga aberya sa trapiko kay magiyahay raman og lusot aron makauna ang mga sakyanan.

Usahay mao kini hinungdan nga magkabanggaanay ug makaingon sa mas grabe pa hinuong problema sa trapiko hangtud nga dili masusi sa mga traffic accident investigators.

Duna man tinuod kini daghang traffic enforcers apan may limitasyon sila kay tawo ra lagi.

Makita ra sila diha sa dalan kun landong pa o dili pa udtong tutok, apan kun mosaka na og maayo ang haring adlaw, lisud na silang pangitaon kay kinahanglan man nilang mopasilong.

Sahi ra kung duna pay tarong ug modernong traffic system ang kadalanan, kay bisan og walay traffic enforcers mahimo rang mosunod ang mga motorista nga dili mga badlungon.

Usahay kining mga badlungon nga drayber man sab maoy hinungdan kun nganong kinahanglang magbutang og traffic system o traffic enforcers.

Ang taras sa mga drayber nakapasamot sa problema. Bisan wa nay masudlan diha sa intersection modutdot gihapon, hangtud na sila nay nakabara sa nagkurus nga dalan kay wala may disiplina.

Bisan gani og naa nay tawong padung motabok o nakatabok na sa pedestrian lanes dili gyud mohunong ang sakyanan.

Dungan unta sa pagbutang og modernong traffic system,  maayong butangan og CCTV cameras ang matag eskina nga maka-detect sa mga sakyanang malapason sa trapiko ug may traffic enforcers dayong mosikop kanila sa unahan.

Kay way kapuslanan ang modernong traffic system kun ang mga drayber maghari-hari lang gihapon gumikan kay walay mopitol kanila diha sa kadalanan.