Masiao mosiaw

Sa pagpahunog sa tanang mga duwa ubos sa Philippine Charity Sweepstakes Office PCSO, gipanglantawan nang daan nga mosiaw na usab ang mga illegal numbers game sama nalang sa masiao nga nabantog sa mga bisaya.

Mao kini ang gihugtan sa pagbantay karon sa atong kapolisan nga dili makasolbong o molipang ang mga illegal nga sugal.

Gani kining masiao wala man ni mahunong seguro bisan pa man nga anaa pa ang mga legal numbers game.

Gani ang gihimo nilang basehan sa resulta ang kadtong legitimate result sa PCSO.

Ang buhaton sa mga financier ang pagbola sa kaugalingong numero aron tuloy ang ligaya sa ilang underground nga kalihokan.

Gawas sa masiao laing molipang ang hantak, tigbakay, ug ubang matang sa sugal nga naandan na sa mga pinoy nga sugarol.

Unsaon man sa pagsumpo sa mga otoridad ang mga underground gamblings?

Dinhi na mosulod ang community involvement o pakiglambigit sa katawhan.

Makiglambigit ba pud kaha ang mga tawo nga nag patronise sa sugal? ambot lang!

Pero basin diay dunay magpakabana ilabi na kadtong pirmeng mapilde nga mo-report sa kapolisan aron sad makabalos.

Dakong hagit kini sa mga otoridad ang pagpakgang sa mga illegal nga sugal apan ubos sa ligdong nga liderato sa PRO7 posible ra nila kining mahimo.

Ang mga financier lang ang makakwarta ug dili mabahinan ang katawhan nga nagkinahanglan og tabang.

Bentaha nalang seguro ang mga sugal ubos sa PCSO kay naa may mapaabot nga tabang ang mga tawo. 

Apan kanus-a kaha mabanhaw ang mga duwa sa PCSO? Aw ang pangulo ra gyud ang nahibalo.