Panghasi sa mga rebelde

Susama dinhi sa Sugbo, uso usab karon ang mga pagpatay didto sa silinganang lalawigan sa Negros Oriental.

Halos matag adlaw, dili gayud masipyat nga adunay mahagba sa nagkalainlaing lugar didto sa maong probinsiya.

Hinuon, sukwahi dinhi sa Sugbo diin kasagarang hinungdan sa mga pagpatay naglambigit sa negosyo sa ilegal nga druga.

Ang serye sa mga pagpatay didto sa Negros Oriental adunay kalabotan sa padayong kawsa sa mga walhon o sa mga rebeldeng komunista.

Basi sa taho, sulod sa 10 ka adlaw, mokabat sa 19 ka tawo ang gipangluthang sa nagkalainlaing lugar didto sa Nagros Oriental.

Kini lakip na sa upat ka pulis nga giataki sa giingong mga rebelde nga komunista sa niaging semana.

Sa ubang insidente sa mga pagpatay, nagkadaiya ang mga biktima.

Adunay kanhi mayor, mga kapitan ug ubang lokal nga opisyal.

Ang uban mga abogado ug mga lokal nga opisyal sa Department of Education.

Hinuon miadmiter ang rebeldeng New People’s Army nga responsable kini sa ubang mga pagpatay didto.

Kini ang hinungdan ngano nga nagpadala og dugang puwersa ang kagamhanan sa maong lalawigan sa tumong nga mahunong na ang pagbanaw sa dugo.

Angay lamang gayud nga mohimo og daling aksiyon ang kagamhanan, ilabina ang military ug kapolisan, niining mga pagpatay sa Negros Oriental. Kini aron usab nga nahatagan og daling hustisya ang mga biktima ug ang ilang pamilya.

Kun tinuod nga ang mga rebeldeng komunista ang nagpaluyo sa ubang insidente sa mga pagpatay karon didto sa atong silingang probinsiya, nan angay lamang nga gukdon sila sa atong kasundalohan ug kapolisan.

Lisod nga pasagdan lamang sa kagamhanan ang nagkagusbat nga imahe sa kahusay ug kalinaw sa Negros Oriental karon.

Kay kun wala kini dinalian nga solusyon, sama ra nga putol ang ikog sa atong gobiyerno paghapak ngadto sa bayolenteng binuhatan sa mga rebeldeng komunista nga padayong mihasi sa maong lalawigan.