Ampo sa walay hunong

Hulyo 28, 2019: Ikanapulog-Pito nga Domingo sulod sa tuig

Mga Pagbasa:Gn. 18;20-32/Sal. 138/

Col. 2;12-14/Lk. 11;1-13

Kabahin gyud sa kinabuhi sa tawo ang pag-ampo. Apan dunay mga higayon nga bation kita og kalaay sa paghimo niini. Kaha tingali kay wala nato makuha ang atong gusto sa dihang kita mosangpit sa atong gikinahanglan. Mao nga daghan nato ang motalaw dayon sa hilabihan.

Motalaw tungod kay alang nato wala kita paminawa. Motalaw tungod kay diha sa atong kinabuhi nahimong kita mismo dili diay paigo sa gitawag natong pag-ampo.

Ang bugtong gitudlo ni Jesus nga recorded diha sa Balaang Kasulatan nga pag-ampo mao man ang pag-ampo sa Amahan Namo.

Ang Amahan Namo ingon nga pag-ampo nagtudlo kanato ning mosunod:

1.    Ang Dios dili diay halayo. Dios siya sa kalambigitan ug gani Dios siya nga kabahin gyud sa atong kinabuhi. Dili lang siya Dios kondili Amahan Usab.

2.    Ang Dios isip Amahan mogahin gyud dili lang sa atong mga kapritso kondili usab sa atong mga panginahanglan. Iyang gihatag ang haom alang natong tanan. Iyang giandam ang atong kinabuhi ug ang gikinahanglan natong pan ug kalan-on adlaw adlaw. Kini ang kahulogan kun maghisgot kita og Diosnong Pag-amoma.

3.    Nagdapit usab kanato sa paghatag sa atong pasaylo aron kita mismo usab mapasaylo sa atong mga kalapasan. Buot sa Dios nga kita maayo gikan sa emosyonal nga balatian.

4.    Nagdapit kanato sa pagpangayo nga unta kita sa kanunay mapanalipdan gikan sa gahum sa dautan. Ang dautan nga kanato mosulay kun matinud-anon ba kita o dili ngadto sa Dios nga atong gisimba.

5.    Nagdapit kanato nga bisan pa man may panginahanglan kita o wala padayon gihapon kita sa pag-ampo.

Ang pag-ampo dili lang pagpangayo. Ang pag-ampo dili lang pud mahitungod sa panginahanglan. Ang pag-ampo pakigrelasyon sa kahitas-an. Mao nga kun bisan asa man ako padayon gihapon ko sa pag-ampo.

Nagpasalamat ko nga bisan pa man sa akong kahimtang ang Dios wala gihapon mobiya kanako. Amahan gyud siya ug dili maantigong motalikod.