Nalisang

Human gipistahan sa publiko ang gihimo ni kanhi mayor Tomas Osmeña nga paghimulbol sa iyang buhatan, tinguha niya karon nga ikiha ang mga abogado ni Mayor Edgardo Labella tungod kuno sa pagbabag nga ayuhon ang kanhi niya opisina.

Matud ni Osmeña nga human niya gisugo ang mga trabahante sa usa ka construction company nga tangtangon ang iyang personal nga mga gamit, buot unta nila nga ayuhon ang maong opisina ug ibalik sa kanhi niini hitsura sa wala pa niya i-renovate dihang midaog siya sa eleksiyon niadtong 2016.

Apan matud ni Osmeña nga gipugngan ang mga trabahante nilang Atty. Rey Gealon nga karon maoy city attorney ug ni city administrator Atty. Floro Casas hinungdan nga wala na kini mahitabo. Aron pagmatuod nga dili niya tuyo nga biyaan sa ingon niini nga kahimtang ang kanhi niya buhatan, mipadala pa og suwat si Osmeña ngadto ni Labella naghangyo nga tugotan ang mga sakop sa iyang contractor nga ayuhon ang nagkagidlay nga opisina.

Apan gibalibaran ni sa City Hall tungod kay matud pa ni Gealon posibling manubag sila sanglit aduna nay kaso nga gisang-at batok sa kanhi mayor.

Usa ka butang ang tataw sa gihimo karon ni Osmeña. Nalisang siya nga madutlan sa kaso nga gipasaka batok niya. Ang kalit nga kausaban sa iyang mga rason human sa hitabo nagpakita sa iyang kahingawa. Wala ni kalainan sa mga timailhan nga siya pildihonon ni Labella niadtong nagsing-abot pa ang eleksiyon.

Nahinumdom tingali mo nga siya gyud maoy nagsigi og panghagad og debate batok ni Labella. Sukwahi ni sa naandan niya ug sa iyang gitudlo sa iyang mga sakop nga dili makigharong og debate sa kontra kon naglawig ang ilang kadaugan. Ang resulta sa eleksiyon nagpakita nga husto ko sa akong pangagpas.

Sa nahitabo sa iyang buhatan, mapasigarbohon si Osmeña nga miangkon sa iyang gihimo tungod kay buot kuno niyang matagamtaman ni Labella ang iyang gibati dihang wala siya hatagi og pundo aron ipaayo sa iyang buhatan.

Kini maoy hinungdan nga personal niyang gasto pinaagi sa iyang mga higala ang pagpaayo sa iyang opisina dihang milingkod siya isip mayor. Basi sa iyang pamahayag, gituyo gyud niya nga gub-on ang iyang opisina sa dili pa mokanaog sa katungdanan. Apan dihang gipasakaan na og kaso, mikalit og lubad ang iyang pamahayag.