Keith gipakaog leksiyon

Daw wala moginhawa ang tibuok kalibotan pagharong nilang Manny Pacquiao ug Keith Thurman ibabaw sa ring didto sa MGM Grand Garden Arena, Las Vegas, Nevada sa miaging Sabado, Hulyo 20 (Domingo, Hulyo 21 na dinhi sa Pilipinas) aron ipamatuod kinsa nilang duha ang ilhong hari sa WBA Welterweight division.

Unsaon, naghinangat pa lang ang ilang away, gidigo na si Manny ni Keith og daghang bugalbugal, nagkadaiyang hambog ug makalilisang bahad nga iya kunong paretirohon ang the one and only Eight World Boxing Division champion nga Pacman pag-abot ning maong adlaw.

Hinuon, may katarungan si Keith sa iyang pag-underestimate ni Manny. Sa tupad, kon nahasunoy pang igtatari, si Manny bisaya. Samtang si Keith, amerikano. Sa gitas-on, gidak-on ug edad, dehado si Manny.

Agig tubag sa mga pagbugalbugal ni Thurman, si Pacquiao miingon: “Thurman has it easy. His only job is to train for this fight. I have 3 jobs: I am a fighter, a public servant, and on Saturday I’m going to be Keith Thurman’s teacher. I’ll give him a very hard exam.” Tuod man, pag-abot sa maong adlaw, taliwala sa minilyong boxing fans sa tibuok kalibotan, sa unang rawon pa lang, iyang gi-knock down si Keith.

Usab, pagka Round 10, mitugpa ang solidong suntok ni Manny sa kilid bahin sa lawas ni Thurman nga mipakulo niini ug nahisama na lang sa misariling ligid sa biseklita nga puwerting paningkamot nga makabalanse aron dili matumba sa gikuyawang luna.

Ning tungora, daling gitangtang ni Thurman iyang mouthpiece aron makaginhawag tarong. Unsaon, guba na ilawom sa iyang ilong ug nawantayman pa gyud iyang gusok.

Gikan sa unang rawon ngadto sa ika 12, natagbaw’g tubag si Thurman sa mga lisod kaayong kombinasiyon sa kumo ug estilo sa pagpakigkombati ibabaw sa ring nga gihatag ni Pacquiao kaniya agig pagsukod unsa kahait ang mga hinigibang nahuptan ni Thurman.

Pinaagi sa split decision gikan sa 3 ka judge, midaog si Manny. Wala na gyoy trash talks nga migawas sa baba ni Thurman. Hinuon, iyang gidayeg si Manny sa nahuptan niining bulawanong hiyas sa kinabuhi. Ug labaw sa tanan, miangkon si Keith, nga ning ilang panagsangka, gipakaon siyag daghang leksiyon ni Pacman.