EDITORYAL - Kinsay angay manubag?

Kinsa may angay basulon sa nahitabong aksidente sa Lungsod sa Boljoon nga gikamatay sa siyam ka mga estudyante ug niangol sa 16 pa ka mga sakay sa trak de karga diha sa Barangay Becerril sa maong lungsod?

Ang drayber? Ang taga DepEd? Ang mga ginikanan? O ang lokal nga kagamhanan sa lungsod sa Boljoon? Kinsa may angay pasanginlang sad-an sa maong hitabo? Asa man mangayo og hustisya o bisan bayad sa danyos ang pamilya sa mga nakalas?

Sa pagkakaron ang nalat-an ug gibasol og maayo mao ang drayber kinsa usa sab sa mga naangol sa maong aksidente. Siya maoy mapasakaan og kasong reckless imprudence resulting to multiple homicides ug multiple physical injuries and damage to property.

Normal kini tungod kay siya may nagmaneho sa trak nga nadisgrasya, ug isip drayber naa sa iyang kahanas pagmaneho nag-agad ang kaluwasan sa iyang mga sakay padung ug pabalik sa ilang mga destinasyon.

Apan siya lang bay angay nga manubag ug moako sa tanan? Dili ba gisugo ra sab siya ug isip trabahante igo ra siyang mosunod sa mando?

Ang maong trak de karga nga usa ka mini-dumptruck giingong gipanag-iya sa lungsod. Ug opisyal sa DepEd mao ang giingong ni-request og kasakyan sa mga bata gikan sa bukirang barangay aron makatambong sa parada sa mga atleta diha sa Poblacion sa lungsod.

Ang Department  of  Interior and Local Government niadtong 2011 mipagawas og memorandum sa tanang LGUs nga dili gamitong transportasyon sa tawo ang mga dumptrucks sa lungsod gawas nalang kun panahon sa emerhensiya.

Aksidente ug walay gustong mahitabo kadto.

Ang mga trak ra gyud maoy madali nga magamit sa mga bukirong barangay paghakot og dinaghan nga tawo, apan tungod lang ba niini dili na pangitaan og solusyon aron di na kini masubli pa?