Si mama ug ang paraygon

“Akoy Batang Paraygon pinalangga ako ni Mama bisan unsay pangayoon ang tanan ihatag dayon.

Maghilak gayud si Dodong kung wala diha si Mama, motindog ug mosayaw aron si Dodong mohilom dayon.”

Mao kini ang kanta nga akong namat-an sukad nakamatngon ko og buot nga maoy kantahon pakatulog sa akong inahan.

Literal nga dili ko mohilom kon dili motindog ug mosayaw si mama sa higayon nga iya na akong pakatulgon.

Nagdako ako nga balik balikon ang kanta bisa mubo ra pero hangtod karon mao gihapon ang makapakatulog nako.

Sa pagsaulog nako sa ika 44 nga kasumaran sa akong pagkahimugso ning kalibutan ugmang adlawa usa ni sa akong wish nga mabati gikan sa akong inahan.

Apan kutob nalang sa pangindahay ang tanan tungod kay dili na nako mabati hangtod hangtod sa hangtod ang naasoyng sonata.

Wala na ang original singer, mipahuway na sa dayon, apan bisan pa man magpabilin gihapon nga immortal ang huni sa akong panumduman. 

Ang Inahan buhaton gyud ang tanan alang sa iyang mga anak gikan sa pagsamkon pa lang sa sabakan, giamona na gugma aron maseguro nga makasaksi sa katahom sa kalibutan.

Siyam ka buwan gisabak ang kinabuhi sulod sa iyang tiyan dili na balihon ang peligro nga masinatian.

Sa paghimugso sa kinabuhi gikan sa sabakan naglatay na sa lugas lanot ang kinahuhi niya kansang pikas tiil toa naa sa kalibutan samtang ang pikas anaa na sa kamatayon.

Gipadako ug gimatoto gikan sa pagkahimugso, gani ang unang pulong nga malitok sa anak ang Mama.

Dugo ug singot ang gibuhis sa inahan aron duphan ang anak nga dili gyud gani patugpahan og lamok, labaw na sa mga kamot sa tampalasan.

Andam makigpatay basta mapanalipdan ang anak nga hinukad sa iyang sabakan.

Kun dunay pangitaon nga dili makita dayon moingon ang anak “ma asa naman to, ma dili ko kahibalo, ma ikaw lang kuha kay mauwaw ko...” Tungod kay pinangga mosugot lang intawon nga himoong sulogoon sa anak ang mama.

Inig ka dagko na sa mga anak, isipon gihapon kining baby sa mga inahan tungod sa gugmang walay sukod.

Sa panahon nga walay ikabayad sa tuition si mama dayon ang magpabaga og nawong sa paghangyo nga ipa take lang sa exam.

Ang hiyas sa inahan walay sukdanan, sobra pa sa 24/7 nga serbisyo ngadto sa mga anak.

Bisan og dunay dakong kakuwangan ang anak apan sa mata sa inahan perpekto kini, gani bisan sa kadaghan ug kadagko nga sala sa mga anak sama nako ni bisan usa ka higayon wala ko mahinumdum nga nakasab-an ko ni mama.  Siya ang akong Mama Gaudencia, ang Martyr nga Inahan sa mga Batang Paraygon.