Gipatimbang nga Kaalam

Inay sa mga tinun-an, didto na hinoon sa junk shop napatimbang ang mga school supplies nga gipamalit sa Kapitolyo nga tinguha untang ipang apod apod ngadto sa eskwelahan sa lalawigan sa Sugbo.

Apil sa napatimbang ang mga libro nga nagtagik sa kasaysayan sa lalawigan ug sa kalungsoran sa Sugbo.

Pastilan makapahugno kaayo sanglit adunay daghang mga tinun-an ang nagkinahanglan sa mga school supplies.

Kung nahatag lang unta kini kanila dako gyud unta kaayo og gikatabang sa ilang pagtuon. Mokantidad og 34 mil pesos ang naasoyng mga school supplies, samtang ang mga libro wala pay kwentada pila apan nahalin lang kini og 4 mil pesos.

Matud sa OIC  sa Provincial Government Services Office PGSO Bernard Calderon nga usa ka regular employee sa ilang buhatan ang mihimo niini kinsa mibaligya sa mga gamit sa eskwelahan ug libro niadtong Hunyo 30 apan nadiskobrehan nila niadtong miaging Biyernes. Kini base usab sa impormasyon nga nadawat kalabot sa naasoyng tinonto. Nganong nahitabo man kini ug giunsa man niya sa pagpalusot ang naasoyng mga butang? Wala pa nganli ang empleyado samtang nagpadayon pa ang imbistigasyon, apan giingong dunay nagsugo kaniya nga palimpyohan ang warehouse nga gibutangan sa mga butang. Perti gyung limpyoha kay nahawan man ang bodega tungod kay gidala man sa junk shop.

Si Governor Garcia hilabihan ka hugno sa nahitabo tungod kay gianugnan kaayo siya sa kahigayonan nga magamit unta sa mga bata ang naasoyng mga school supplies.

Matud sa gobernador nga kada suroy niya sa kalungsoran bisan kadtong wala pa siya makabalik sa Kapitolyo ang pangaliyupo sa mga ginikanan ug mga bata mao nga mahatagan sila og school supplies.

Kahinumduman nga mao na kini ang programa ni Garcia kaniadto dihang siya pa ang nangatungdanan sulod sa siyam ka tuig. Busa matod sa gubernador nga dunay manubag sa naasoyng pagpatimbang sa mga butang nga gitumong unta alang sa katawhan. Dili lang kadtong kawani nga mipatimbang kon dili kadtong tanan nalambigit nga maoy apil sa gipahigayong imbistigasyon. Hinoon ipaagi sa due process ang tanan apan kon mapamatud-ang sad-an aw unsay langayan? silot ang padulngan.  Ang libro sa kasaysayan sa Sugbo walay katumbas nga salapi tungod kay kaalam ug kinaadman ang sulod niini mahitungod sa Sugbo. Unta naapod apod na kini ug napahimuslan sa mga Sugboanon.      Subo palandungon nga nabarato ang bili sa mga butang nga walay katumbas nga salapi tungod kay hinagiban kadto sa pagbaton og kaalam nga mao ang mga libro ug kagamitan sa eskwelahan.