Di kasulti kay puno ang baba

Mga mananagat nga giingon nga nabanggaan sa barko sa mga Intsik nagmakuli na karon pagluwat bisan diyotay nga pamahayag bisan bali-balihon ug pangutana sa mga reporter human gipakaon ug gihatagan hinabang-pinansyal gikan sa Filipino-Chinese Chamber of Commerce.

Wala na makatingog ang mga mangingisda kay gawas nga may sulod na ilang bulsa,  puno pa usab sa pagkaon ang ilang mga baba. 

Dili ba matud man ni Lola, “Ayaw og sulti kon aduna pa’y sulod ang baba?

Ulan: kasakit ug panalangin

Ang pagbaha sa daghang mga lugar sa Bulacan ug ubang bahin sa Metro Manila gumikan sa padayon nga pag-ulan niadtong milabay nga semana nakahasol na sa mga motorista ug nakapahunong usab sa klase sa kabataan.

Apan matud pa sa MWSS, kulang pa gayod ang ulan aron dili na magpabilin sa kritikal nga level ang tubig sa Angat

Dam nga maoy tinubdan sa tubig sa Metro Manila. “Ulan, kasakit ka sa uban, apan panalangin ka sa kadaghanan!

Naay fish, way order

Tulo ka tuig human sugdi ang gubat batok sa ilegal nga druga, mipadayag si PNP Chief Police  General Oscar Albayalde, nga ang gobyerno nagmalamposun sa gubat batok sa Druga.

Matud niya, ang labing dako nga timaan sa kalampusan sa maong kampanya mao ang nag-uswag nga kahimtang sa Peace and Order.

Apan kon ang ubang taga-Mindanao ang pasultihon mahitungod sa ilang Peace and Order, sila moingon: “Naay daghan nga FISH, pero wala’y ORDER!

Akong sugo, akong sugot!

Gipadayag sa bag-ong napili nga Mayor sa Sugbo, Mayor Edgardo Labella, nga iyang hatagan og dakong pagtagad ang paglolekta sa basura. 

Iyang gimandoan ang mga kawani sa Department of Public Services sa paghipos ug pagkuha sa mga basura palibot sa siyudad labi na kadtong nakabara sa mga kasapaan.

Hinaut nga motuman na ang mga kawani sa DPS nga daw nagmika lang sa unang panahon kay aron dili ang Mayor makatuaw sa pag-ingon: “Akong Sugo, Akong Sugot!”

Angkonon ko gayod

Ang DILG nagkanayon nga mahimo’ng kasohan si kanhi Mayor Osmena sa Ombudsman gumikan sa iyang pagsugo pagpanglangkat sa mga tiles ug ubang mga mahinungdanon’g mga kagamitan lakip na gani ang inidoro sa iyang pansayan.

Daw sama kini nga buhat sa lalaki nga napakyas sa gugma nga moingon: “Kon dili ka maako, dili ka usab kapahimuslan sa uban.” Faeetz!!!