Kwentas Klaras

Hapit na mapupos ang takna mao nga naningkamot nga mohimo sa hinayhinay sa accounting nga gikinahanglan aron malimpiyo na unta ang tanan inig turn over sa sunod nga pamunoan.

Kapoy baya ning kalakiha apan mas labing maayo nga ato gyud ning buhaton aron sa ingon mamahimong hapsay ang tanan ug makapadayon kita sa sunod panaw sa kinabuhi.

Sa akong paghimo sa ingon akong nakita ang akong kaugalingon nga makig-atubang sa Dios. Wala lang tuyoa akong na imagine nga nakig atubang ko sa Labaw’ng Pari nga nihimo sa iyang masudyaong pagtutok.

Nakita ko nga daw dunay flash back sa akong kinabuhi. Akong gitimbang timbang mura tingali og mas daghan ang sipyat.  Nanghupaw siya, nagpaminti sa kasuko  apan sa kaulahian iyang gibuhian ang pangagho. Gipikpik niya ang akong abaga dungan ang pag-ingon: “Ang mahinungdanon nga Ikaw nagmatinud-anon bisan pa man sa imong kamasalaypon!” Kini ang kahulogan sa kwentas klaras! Sa akong bahin nakita ko ang akong kaugalingon nga nibakho dili sa kasubo kondili sa kamapasalamaton nga bisan sa tanang panghitabo wala diay ko pasagdi sa Ginoo.

Ang transparency gikinahanglan baya kaayo labina sa paagi nga atong gigamit ang mga butang nga kanato gipiyal. Unsay angayang tagoan kun sa kaulahian biyaan lang nato ang tanan? Nindot man tuod ang magdato apan mag-unsa man ang imong kadato kun nahimong maparot ang imong pakiglambigit sa imong isigkatawo?

Mag-unsa man ang imong kadaghan og sakyanan kun magdumili ka sa pagpasakay mismo sa imong silingan? Pastilan kanunay tang nagdali ug nahimong stressful kaayo ang atong kinabuhi apan sa kaulahian ang dayag nga kamatuoran atong tabonan kay dili kita buot nga masakpan ang atong kahuyangan.

Apan bisag unsaon pa nato og tago niini dili ug dili gihapon kita makaikyas. Mao nga mas maayo nga himoon nato ang atong kaugalingon nga abli ug tagana sa bisan unsang maayo apan wala magpasabot nga atong pasagdan ang atong privacy tungod ug alang sa transparency. Ang mahinungdanon mao nga bisan unsa pa man ang mahitabo gumikan sa atong kaabli dili unta kita bation og kahadlok.

Diha sa panaw sa kinabuhi padayon natong subayon ang dalan nga magdala kanato ngadto sa dunay kapaingnan bisan pa man sa atong mga kalisdanan. Tuyhad ang atong linaktan tungod kay wa kitay gitagoan. Ug wala kitay gikahadlokan sanglit nahimo mang atong nayagyag ngadto sa Dios ang bisan unsa nga giisip natong bililhon ug imbis atong tagoon ato mang gihalad ingon nga gasa ngadto sa tinubdan sa tanang butang maayo.