Kun Kapa gipasagdan

Mas daghan ang pobre sa Pilipinas kay sa adunahan. Sagad sa misamot kaadunahan, mga politiko ug mga higanteng magpapatigayon. Kini tungod kay ang eleksiyon sa atong nasod gihimo mang dakong negosyo sa mga marung sapian: sa mikandidato ug sa  negosyanteng bigtayim.

Ang kandidato mogasto gyud og minilyong puhonan panahon sa pagpangampanya. Samot na ang mga negosyante. Ang magkaatbang kandidato iya gyong suportahag pinansiyal.  Buwahan, bisag kinsay modaog, maprotektahan gihapon iyang mga negosyo.

Dali ra siya makabawi ug makaganansiyag dako sa pilay iyang nagasto, kay mopanday man ang kandidatong nakadaog og balaod nga pabor pirme sa mga negosyante.

Kana lang Train Law ug kanang daw lipatlipat nga pagpasaka-paubos sa presyo sa gasolina, diin naglabaw gyud pirme ang pagsaka, di ba mga negosyante ra ang nabulahan? Kitang mga kabos ang nagbaguod sa kabug-at sa epekto niini.

Ultimong may mga desenteng trabaho sa dagkong kompaniya, naglisod intawon pagbuhi sa ilang pamilya, kay imbes tabangan sa maong balaod, ginudnod  hinuog samot sa  kalisod.

Hinungdan, pipila kanila ang misulay pagpamiyembro sa KAPA , kinsa miingon nga tungod sa 30% interest nga balik sa ilang kuwarta kada bulan gikan sa gipondar nilang investment, natilawan nila ang kalipay.

Gani, matud pa sa kasaligang tinubdan, miabot mag singko milyones ang mga miyembro sa maong kontrobersyal nga grupo dihang mimando si Pres. Duterte nga ipasira kini. Apan kun wala lang kini hilabti sa pangulo, magsige pa untag dawat ang mga miyembro sa 30% love gift interest nga magmatuod, Kabos Padatoon.

Kun ang maong kita magpadayon sa mga katuigang molabay nga walay paltos, magkadaghan gayod ang magpasakop sa Kapa hangtod nga mayoriya sa populasyon sa tibuok Pilipinas mopasilong ni Pastor Joel Apolinario.

Delikado nga sa hilom, maghimo silag kaugalingong honest community ug talikdan nila kining atong gobiyernong puno sa kurapsiyon, diin ang kuwarta sa katawhan, kawaton lang sa mga corrupt officials (hinuon di tanan), hinungdan, nga ang kinabag-ang panon sa mga Pinoy nagpabiling nagkamang sa lapok.

Gusto ang masa nga mouswag. Nakita nila kini sa poder ni Apolinario. Busa, kun gipasagdan pa lang ang Kapa, basig matinuod kadtong panagna sa usa ka propeta, nga moabot ang panahon nga ang Pilipinas mahimo nang maoy kinadatoang nasod sa tibuok kalibotan.