EDITORYAL - Pag-insulto, way respeto

Usa ka dakong insulto dili lamang sa mga kababayen-an ang gihimo ni Foreign Affairs secretary Teodoro Locsin Jr. pagtawag kang Bise Presidente Leni Robredo nga “boba” (bogo) kondili hasta sa opisina mismo sa Bise Presidente.

Dili sab kalikayan nga mahimong sabton ang gihimo ni Locsin ngadto sa ikaduhang labing gamhanang opisyal sa Pilipinas, nga hangtud dili protektado gikan sa pagabuso ang kababayen-an dinhi. Si Robredo nga bise presidente sa Pilipinas hinganlan lamang og bogo sa usa ka kalihim?

Mahimong moingon si Locsin nga dili niya intensiyon nga insultohon ang tanang kababayen-an apan dili siya makapamakak nga wala siyay respeto sa bise presidente adtong tungora. Ang tanang kawani sa gobiyerno kinahanglang motamod sa Republic Act 6713 or the Code of Conduct and Ethical Standards for Public Officials and Employees. Para sa Malacañang wala makaapektar ang ‘colorful words’ ni Locsin sa trabaho niini isip kalihim sa DFA kay parehas ra sa kang Pres. Duterte kinsa wala say lipud-lipod kun moestorya.

Mao ba? Presidente diay si Locsin? Ipatahod gani bisan ang mga traffic enforcers, ang bise presidente pa kaha?

Si Robredo mipasidaan lamang kang Locsin sa plano niining kanselahon ang diplomatic passports sa mga kanhi diplomats ug kanhi opisyales sa Pilipinas human sa nahitabo kang kanhi DFA secretary Albert del Rosario nga gipugngan ug gi-detinir didto sa tugpahanan sa Hong Kong. Si del Rosario didto sa Hong Kong alang sa board meeting sa ilang kompanya, ug isip kanhi kalihim may diplomatic passport kini gikan sa gobiyerno.

Klaro kaayong may malisya ang motibo sa mga otoridad sa Hong Kong ngadto kang del Rosario, pakauwawan kini tungod sa pagpanalipod niini sa interes sa Pilipinas sa West Philippine Sea, mao sab kini ang gidangatan ni kanhi Ombudsman Conchita Morales sa mao gihapong tugpahanan niadtong bulan sa Mayo.

Si del Rosario ug Morales mikiha kaniadto ni Chinese presidente Xi Jinping didto sa International Criminal Court og kasong crimes against humanity tungod sa gibuhat sa China diha sa West Philippine Sea.