Wala nay mahimo

Milurang na ang mga pag-alburoto sa pipila ka sektor mahitungod sa dakong kontrobersiya didto sa Recto Bank diin usa ka barko sa mga mangingisdang Pilipino ang giingon nga gibanggaan sa barko sa Tsina.

Sa niaging semana, grabe ang pagbatikos sa pipila batok kuno sa ka kulang sa aksiyon sa kagamhanan batok sa maong insidente. Kini ilabina na nga tak-om ang baba ni Presidente Rodrigo Duterte pipila ka adlaw human sa maong insidente.

Apan sa dihang mibuka na ang baba ni Duterte, haskang dalia usab nakabatikos sa uban. Kini tungod kay gipagamay lamang sa presidente ang maong insidente gumikan kay aksidente lamang kuno kini ug nga dili kini angay nga padak-on pa ang maong isyu.

Gusto man gud niining oposisyon ug mga militante nga sunggalon mismo ni Duterte ang China gumikan sa maong insidente.

Kay wala man niya buhata, aw grabe ang ilang kadismaya ug miakusar sa presidente nga walay dugokan basta isyu na gani sa China ang hisgotan.

Hinuon, nakapasaka na og diplomatic protest ang Department of Foreign Affairs batok sa China gumikan sa maong insidente.

Ug aduna nay separate.nga imbestigasyon ang gipahigayon sa China ug Pilipinas.

Kun tinuod man nga gibanggaan gayud og tuyo ang barkong mangingisda sa Pilipinas, angay lamang nga adunay hustisya nga makab-ot sa mga biktima maong insidente. Ug angay lamang usab nga mokooperar ang kagamhanan sa China. Apan makapaabot kita nga aduna pay susama nga insidente diha sa West Philippine Sea o South China Sea gumikan sa realidad nga anaa diha nagluklok ang dakong presensiya sa mga barko sa China.

Tungod kay giokupar na sa China ang halos tibuok nga kadagatan, dili na gayud malikayan nga mahitabo ang ingon niini nga insidente.

Ug bisan kun unsaon pa sa tanan dinhi sa nasud og tagawtaw, wala na gyud kitay mahimo pa.