Padayon ang nga pagpatay

Usa ka inilang pulitiko ug usa ka pulis dinhi sa lalawigan sa Sugbo ang giluthang sa niaging semana ug daghan ang mituo nga may kalabotan ang ilang pagpatay sa dakong giyera batok sa ginadili nga druga ning administrasyon ni Presidente Rodrigo Duterte.

Unang gilikidar sa wala mailhing mga mamumuno si kanhi Medellin mayor Ricky Ramirez kinsa nailalum sa hospital arrest human kini gisikop sa otoridad tungod sa kasong illegal possession of firearms and drug paraphernalia.

Dili momenos 15 ka armadong tawo ang misulong sa hospital sa maong lungsod.  Walay guardia sa hospital mga sakop sa BJMP nga nagbantay kang Ramirez ang nakasukol, hinungdan nga milampos sila sa pagpatay sa kanhi mayor nga konsehal sa lungsod na karon.

Didto sa lungsod sa Cordova, patay ang deputy chief sa Cordova Police Station sa dihang gibanhigan kini sa mga armadong nagsakay og motosiklo samtang nag-drive kini sa iyang pickup padulong sa iyang pinuy-anaan.

Ang pagpatay kang Police Chief Master Sergeant Deogenes Carillo aduna kunoy kalambigitan sa druga. Mao kini ang pangagpas sa mga imbestigador tungod kay adunay akusasyon nga usa kuno ka ‘narco cop’ si Carillo.

Sa maong pagluthang kang Ramirez ug Carillo, dili malikayan nga daghan ang mituo nga binuhatan kini sa mga ahente sa gobiyerno ilalum sa dakong kampanya sa kasamtangang administrasyon batok sa druga.

Kini bisan pa man nga adunay ubang mga anggulo nga angay usab tutokan sa mga imbestigador sama sa bangi sa ubang negosyo ug personal nga motibo.

Hinuon kun walay suspek ang otoridad nga maoy makapunting sa tinuoray nga motibo sa maong mga pagpatay, magpabilin gayud nga adunay koneksiyon sa illegal nga druga ang ilang kamatayon.