Inutok o mikakak?

Bisan unsaon pa og esplikar ang baruganan ni Presidente Duterte sa nahitabo sa Recto Bank, diin gibanggaan ug gibiyaan sa mga mananagat sa China ang 22 ka mga Pilipinong mananagat didto, dili kini maayong paminawon tungod kay nagpakita kini sa iyang pagtalaw.

Ang rason sa pangulo, gamay ra kadto nga aksidente ug simpleng aksidente lamang sa kadagatan. Simpleng aksidente r aba ang pagbangga dayon pagbiya sa mga tawong imong madasmagan?

Kun sa karsada tingali madala pa tingali kay daghan man ang posibleng makakaplag sa mga biktima ug madala sila sa tambalanan.

Apan sa dagat? Diin swerte na kaayong dunay molabay nga laing barko, murag dili sayon dawaton.

Swerte lang gyud nga dihay naaging panagatan sa Vietnam, kay kun wala pa tingali, hangtud karon na missing pa kadtong 22 ka mga Pilipino ug way nasayod sa gibuhat sa Chinese fishing boat kanila.

Dunay mga nag-ingon nga inutok kuno ang aksyon ni Duterte, unsay inutok?

Klaro naman kaayo nga may intension kadtong mga Chinese nga mamatay kadtong mga Pilipino dihang imbes tabangan, igo ra nilang giiwagan sa ilang suga dayon gibiyaan sa ilang kapalaran.

Nganong moinsister man si Duterte nga magka-giyera kun magsukol-sukol ang Pilipinas sa China. Magka-giyera nukleyar kuno ug mangamatay lang ang mga sundalong Pilipino kay wala lagi kunoy dag-anan ang Pilipinas sa China.

Asa naman intawon ang dungog sa Pilipinas sa baruganan ni Duterte? Kay ngano? Kun motingog diay siya batok sa China nangahulogan na diay nga makiggiyera kita kanila?

Kun motingog diay siya paglaban sa mga biktima, mangahulogan na ba diay nga hagiton niya og gubat ang China?

Ang gipaabot sa katawhan mao lamang ang iyang simpatiya ngadto sa mga mananagat isip pangulo sa nasud.

Ang hinabang dili na bag-o gikan sa gobiyerno, apan ang simpatiya maoy gipangita.

Dili ba atol sa kampanya atubangan sa mga mananagat sa Zambales siya miingon nga mosakay siya og jet ski ug iyang sulongon ang artificial islands nga gitukod sa China didto sa Spratly Islands ug itanom didto ang Bandila sa Pilipinas dayon siya mamulong nga amoa kini!?

Asa naman ni karon? Hadlok siya og giyera batok sa China pero nganong bahin sa basura andam siyang makiggubat sa Canada?

Isog siya kanunay batok sa Amerika, European Union ug bisan sa United Nations nga mas daghan ug dako na og natabang sa Pilipinas sud na sa dugay nga katuigan apan sa China, mikakak siya.

Makita nga mas gipalabi niya ang grasya gikan sa China bisan og gitumban na ang pagkatawo ug dungog sa mga Pilipino.