Panahon sa balimbing

Taliwala sa nagpadayong diskusyon sa konseho sa balaodnon nga giduso ni Konsehal Renato Osmeña Jr. nga nagtinguha pagpahamtang og silot sa mga balimbing nga mga konsehal, mideklarar sa way pupanagana si Konsehal Jerry Guardo sa iyang suporta ngadto sa administrasyon ni incoming mayor Edgardo Labella.

Sama sa iyang gihimo nga pag-abandonar sa Team Rama niadtong 2017 aron motabok sa BOPK human sa kapildihan ni kanhi mayor Michael Rama, gitalikdan sab ni Guardo sa way kukaikog ang grupo nga misagop niya aron mobalik sa partido nga iya kanhing gibiyaan. Rason ni Guardo tungod kuno ug alang sa kaayohan sa katawhan. Rason nga sagad natong madunggan sa mga trapo kon traditional politician.

Gawas ni Guardo gipaabot nga duna pay mosunod niya. Si Labella miangkong dunay mga konsehal ug mga kapitan sa pikas grupo nga mipadayag na og suporta sa iyang administrasyon. Nagdumili hinuon siya sa pagtug-an kinsa ang maong mga konsehal ug mga opisyal sa barangay. Apan dili gyud ni imposibleng mahitabo tungod kay human sa eleksiyon maoy panahon sa mga balimbing.

Sagad sa mga politiko gusto gyud nga makig-abin sa midaog. Dili sab nimo mabasol kun sila gusto makig-uban sa mga mananaog tungod sa dubok ta’ng sistema sa politika nga kun dili kaalyado lisud-lisuron sa ilang pagpanirbisyo.

Dili hatagan og pundo alang sa ilang mga programa. Sa sitwasyon sa konseho sa dakbayan sa pagkakaron, mas dako og benepisyo nga makuha si Labella sa matagsakop sa BOPK nga mosuporta niya kay sa makuha sa konsehal nga balimbing.

Kini tungod kay labaw niyang gikinahanglan ang suporta sa mga balimbing diha sa konseho aron mapatuman ang iyang mga programa. Nagkinahanglan si Labella og mayoriya sa konseho aron mapalusot ang mga programa nga nagkinahanglan og pagtugot sa konseho. Kun di niya kontrolado ang konseho limitado ang iyang mahimo. Sa kasamtangan gidominar pa sa BOPK ang konseho sa dakbayan busa gikinahanglan ni Labella ang mga balimbing hangtud nga iyang makuha ang mayoriya nga siyam ka boto.

Ug basi sa resulta sa miaging eleksiyon pito lang ka konsehal nga iyang kaalyado ang midaog. Nagkinahanglan siya og duha aron makuha ang mayoriya. Karon nga anaa na niya si Guardo, usa nalay kuwang nga posibling masulbad sab kun mapatuman ang disqualification nilang Alvin Arcilla ug Sisinio Andales. Si Guardo nga ika-siyam sa miaging eleksiyon posibling makasulod og balik samtang ang laing kaalyado nga si Joel Garganera nga ika-napulo sa ranking makakapyot sab.

Apan mentras dili pa mahuman ang boroka, apiki sa ihap si Labella diha sa konseho busa gikinahanglan niya ang matag-usa ka sakop sa BOPK nga iyang mabunlot aron makasugod sa iyang programa. Ug iya lang ning mahimo kun dunay mobalimbing sama ni Guardo.