Mabulokong panagtagbo

Giisip nako nga mabulokon kaayo ang pagsaulog sa ika-121 nga Independence Day dinhi sa Dakbayan sa Sugbo kagahapon.

Sa unang higayon gilitok ni outgoing Mayor Tomas Osmeña ang pulong “congratulations” ngadto ni mayor-elect Edgardo Labella dihang nagkatagbo sila atol sa Independence Day celebration.

Wala gud ko makapugong sa pagpahiyom diha nga gidawat ni Osmeña ang kamot ni Labella nga maoy miuna sa pagtunol niini aron lamanohon ang mayor human sa iyang speech.

Wala pa ko malimot nga atol sa kampanya sa eleksyon kaniadtong Mayo 13, kanunay tawgon ni Osmeña og “Liebella” ang kaatbang niya pagka mayor.

Apan makabungog nga botos ang naangkon ni Labella mao nga gideklarar siya sa Comelec nga maoy midaog sa eleksyon ug karong Hunyo 30 molingkod na pagsugod si Labella pagka mayor sa siyudad.

Para kanako, mas nindot gyud nga mag-uliay na lang sa maayong kabubot-on sila si Osmeña ug Labella, unya sinsero nga moabag si Osmeña sa bag-ong administrasyon.

Sa inton nga paagi, posible pa gani nga maapil si kanhi mayor Michael Rama sa pag-uliay sa maayong kabubot-on ug magpasabot kini og kalamboan sa Sugbo.

Kon magtinabangay sila si Osmeña, Labella ug Rama, apil na ang duha ka kongresista sa Sugbo, ambot og kinsa kaha nga kandidato nga makapilde kanila.

Pananglit og mag-uliay sa maayong kabubut-on ang maong nga opisyal, sigurado nga molambo ang dakbayan sa Sugbo.

Apan mahitabo kaha nga magkauli sila si Osmeña, Rama ug si Labella? Paniid nako, dili gayud kini mahitabo kay daghan sa ilang mga dumadapig dili mosugot nga mag-uli sila sa maayong kabubot-on.