Inhustisya sa suholan
Inay paboran ang mga magtutudlo sa dugay na nilang gipangayo nga umento sa suholan, ang ilang labaw nga si Education Secretary Leonor Briones niapil hinuon sa pagsalikway sa lehitimo ug dinalian nila nga panginahanglan.
Gibukubuko ni Briones ang iyang mga sakop pinaagi sa pagdason sa baruganan sa economic managers ni Presidente Rodrigo Duterte nga way kuwarta ang gobiyerno aron ikabayad sa umento sa suholan sa mga magtutudlo nga igo lang gi-ulug-ulogan nga maoy nagmatuto sa umaabot nga mga haligi sa nasud.
* * *
Apan ang kakuwang sa panudlanan sa gobiyerno wa kapugong sa pagpatuman sa gisaad sa presidente nga pagdoble sa suholan sa mga polis ug mga sundawo.
Sa bahin sa mga magtutudlo, ang kakuwang sa kuwarta giisip na nga di mabuntog nga babag sa laing pasalig sa presidente nga ilang suholan maoy sunod nga doblehon.
Ang pagbalibad nilang Briones ug sa economic managers wa pa gyud hanigi og bisan unsang balido nga sukaranan, sama sa panginahanglan sa performance appraisal aron pagsiguro nga ang labing takos ug kugihan nga mga magtutudlo mao ray mahatagan sa umento.
* * *
Ang gitulisok sa mga nibabag sa umento sa suholan sa mga magtutudlo mao ang ilang kadaghan. Sa labing uwahing ihap niabot sila og 800,000 ug madugangan pa tungod sa pagpanguha og dugang pagtakdo sa nagpadayon nga pagdaghan sa mga tinun-an.
Nipasidaan ang economic managers nga mogasto ang nasudnong gobiyerno og P300 bilyones matag tuig kun tumanon ang saad ni Presidente Duterte pagdoble sa suholan sa mga magtutudlo. Sa iyang bahin, nipasidaan si Briones nga mogasto ang gobiyerno og P150 bilyones kun usbawan og P10,000 ang ilang binuwan nga suholan.
* * *
Di krimen sa mga magtutudlo ang ilang pagdaghan. Ang bangis nga krimen mao ang pagamit sa ilang gidaghanon isip sukaranan sa paghikaw sa makiangayon nilang suholan. Palihug basaha giunsa pagpatuman ang uwahing uminto sa suholan sa gobyerno:
• Ang suholan ni Presidente Duterte giusbawan og kapin sa P200,000 matag buwan;
• Ang suholan nilang Bise Presidente Leni Robredo, Senate President Tito Sotto, House Speaker Gloria Macapagal-Arroyo ug Chief Justice Lucas Bersamin nisaka og P90,000 matag buwan;
• Ang mga magtutudlo nakadawat lang og P2,000 nga umento sa binuwan nilang suholan.
* * *
- Latest
