EDITORYAL - Bikil sa partido

Wala pa opisyal nga nakasugod paglingkod sa ilang bag-ong mandato ang mga nakadaog sa nakalabay nga piniliay gitay-og karon ang Partido Barug-PDP Laban sa Dakbayan sa Sugbo niining kasungian tali sa duha nila ka mga miyembro nga silang Cebu City outgoing Councilor Jun Alcover ug Mabolo Barangay Captain ug karon councilor-elect Prisca Niña Mabatid.

Ang hinungdan may kalabotan gihapon sa nakalabay nga eleksyon diin nagpasanginlanay ang duha nga “gitagak” ang usa diha sa iyang barangay samtang ang usa namasangil sab nga nag-vote buying ang usa.

Gipasanginlan ni Mabatid si Alcover nga nanghulga sa iyang kinabuhi samtang si Alcover nangangkong aduna sab kini ipangwadwad nga sekreto ni Mabatid nga una niyang gipasanginlang nagpangayo og campaign funds.

Samtang dili kini maayo para sa duha ilabi na sa ilang partido, magbilin kini og dili maayong talan-awon para sa ilang mga supporters dinhi sa North District ilabi na nga nangiwit ang partido batok sa ilang mga kaatbang.

Dugtong silang Mabatid ug Councilor Raymund Garcia lamang ang nakadaog dinhi samtang ika-14 lang si Alcover.

Ang ingon niini nga mga senaryo dili talagsaon kay nahitabo man sab kini sa ubang mga dapit diin magbinasolay ang mga miyembro sa usa’g-usa.

Apan kining  maong hitabo magsilbing pagsuway karon sa grupo ilabi na kanila ni mayor–elect Edgardo Labella ug vice mayor-elect Michael Rama kun unsaon nila kini paghilot nga walay dakong negatibong epekto sa ilang kawsa.

Apan dili hinuon gyud kini makaapektar sa trabaho ini og pormal nang molingkod sa ilang mga pwesto ang mga nakadaog kay wala man kini kalabotan sa trabaho unya sa mga konsehal.

Samtang si Alcover nga napildi sa nakalabay nga eleksyon walay laing mahimo kondili ang pagpili nga tinud-on sa iyang mga hulga batok kang Mabatid o ba kaha mopadaplin nalang sa hilom kay moabot man gyud sa punto nga ang kaayohan sa partido maoy hatagan og prayoridad.