Nag-unay kay way kontra
Ang pagka-blangko sa oposisyon sa niaging piniliay sa Senado niadtong Mayo 13, nga gitiman-an sa pagdominar sa mga politiko nga gipaluyohan ni Presidente Rodrigo Duterte, mahimo nga maoy pabilo sa pagka-usab sa kamada sa mga senador. Nga maoy hingpit nga makapalingkawas sa Senado sa gikahadlokan nga pagka-itoy sa Malakanyang.
Ang unang gikataho nga inosente nga panag-ilog sa labing gamhanan nga mga komitiba tali sa bag-ong napili ug incumbent nga mga senador nga nagpatas-anay sa ilang garbo karon nitumaw na nga seryuso diay nga kampanya sa pag-ilog sa liderato sa Senado.
* * *
Ambot kinsa ang angay nga tulisukon nga ahat nga nag-una-una ining awaya:
• Ang bag-o bang napili nga mga senador nga tungod sa katalagsaon sa ilang kadaogan, mas daghan ang ilang boto kay sa mga karaan, nga ang uban diriyot gani natagak, nagtuo na nga makuha bisan unsay ilang gusto; o
• Ang grupo bang Senate President Tito Sotto nga naneguro sa pagbangil sa di pa makabuylo ang bisan unsang lakang sa pagtangtang niya isip ikatulo nga labing dakong opisyal sa nasud, sunod nila ni Presidente Duterte ug Bise Presidente Leni Robredo.
* * *
Ang nahauna nga mga pagoryo-goryo sa tanang hingtungdan napamatud-an nga mas lawom diay nga maniobra kay inanay nang gihukas ang mga pagpaka-aron-ingnon:
• Labihan ka-insecure sa grupo ni Sotto nga gipa-apil og papirma sa resolusyon pagpabilin sa iyang liderato ang mga senador nga mang-gradwar na karong buwana; ug
• Gikan sa pagka di interesado nga mangu sa Senado, si Senador Cynthia Villar nipasangil na ni Senador Manny Pacquiao nga nangilad sa iyang kaubanan sa PDP-Laban ug ni Sotto nga nidiktar niya ni Villar.
* * *
Atong paabuton unsay mahitabo sa mosunod nga mga adlaw:
• Mahimong mahuwasan ang bag-ong mga senador sa hilanat sa kadaugan ug mo-amin na sa mga nag-una nila sa duyan; o
• Mahimong matinuod ang pasidaan ni Senador Grace Poe nga madugangan hinuon ang mga sakop sa oposisyon sa Senado; o
• Mahimong makaamgo ang mayoriya sa mga senador nga kining kontrobersiya nakahatag nila og kahigayonan sa pagpili og mas takos kay sa ilang lider karon nga nasakpan nga nangopya og karaan nga mga diskurso ug nihingan sa atong nasudnong awit nga ‘Bayang Magiliw’.
* * *
- Latest
