EDITORYAL - Dugang pasakit

Nasamotan ang dakong problemang giatubang sa mga nasunogan sa Barangay Mambaling nunot niining panagsungi sa mga lider sa ilang barangay hinungdan nga bisan dinaliang tabang gikan sa barangay wala pa nila madawat. Hangtud karong mga panahona, ang hinabang palang gikan sa Department of Social Welfare Services sa Cebu City Hall ang nadawat sa 150 ka pamilyang nasunogan nga naa karon nipasilong sa Puntod Gymnasium.

Tulo na ka adlaw karong adlawa gikan sa pagkasunog sa kapin 80 ka panimalay Sitio Huyong-Huyong ug Puntod Alaska, Mambaling apan wala pa gihapon makadeklarar og state of calamity ang barangay.

Dunay pundo ang barangay nga mahimo untang mapagawas alang sa hinabang para sa mga nasunogan, apan tungod kay dili magka-quorum ang mga konsehal wala gyud sila makadeklarar og state of calamity aron magamit unta ang ilang calamity fund.

Dako kining labad sa ulo sa acting barangay captain nga si Anne Marie Vestil Palomo. Ang barangay kapitan nga si Genes Abellana nasuspenso pa sa pagkakaron tungod sa reklamo ni Palomo ug kaubanang kagawad sa wala paghatag sa ilang binuwang honorarium kaniadto.

Si Abellana nagmagahi pagkanaog ug pagtahod sa kamandoan sa iyang suspensyon. Apan tungod sa maong kasungian sa duha, nangapagan ang ilaha mismong mga konstituwente nga nibotar kanila sa maong posisyon.

Hain naman ang delicadeza aning mga opisyala nga motan-aw sa kahimtang sa ilang mga konstituwenteng nagkinahanglan karon? Dili unta mapagan ang mga tawo sa personal nga kasungian sa mga opisyales, ilabi na kun nakalingkod sila sa maong mga pwesto pinaagi sa pagbotar kanila sa mga tawo kay nisalig sa ilang mga pasalig.

Ang pagpanerbisyo diha sa gobiyerno nangahulogang may pagsalig ang yanong katawhan sa ilang katakos sa maong mga posisyon nga mahimong madangpan panahon sa kalisod. Angay tingaling pahinumdoman nga dili hangtud sa hangtud magpabiling naglingkod kining mga opisyala, may umaabot pamang mosunod nga mga piniliay kun dili makalimot kining 150 ka pamilya sa ilang kasinatian.