Moral values or saving lives?

Sagad sa katawhan karon, nagpaulipon sa gahom sa salapi. Gikan sa pobre ngadto sa dato, ang tanan nangita’g paagi unsaon nga mailaha kini. Ang mga kabos naningkamot nga mokuyog sa panagatan, motrabaho’g konstruksiyon, mag-newsboy o maghabal-habal driver aron may ikabuhi sa ilang pamilya. Subo palandungon, nga tungod sa kalisod pangitaon ang kuwarta, usahay moentra sila sa pangita nga gaan ra ang trabaho pero dakog kita.

Maong lisod ang pagpangitag katabang. Kadaghanan sa batan-ong babaye labi nag hitsuraan, mga night clubs ug disco bars maoy landingan.

Usab, ubay-ubay’ng kabos ang mangatintal pagpamaligyag shabu. Kay ning maong pangita lang, nga makatagamtam silag diyotayng kaharuhay sa panginabuhi.

Ingon ini na ang kinaiya nga gibatonan sa katawhan sa Pilipinas. Moral values? Or saving lives from poverty? Nawala na sa kasingkasing ning nasod nga ang kinabag-ang nagpuyo, mga Romano Katoliko!

Usa ka third year Law student, giistoryahan nakog usa ka hitabo aron akong matugkad unsay iyang palabihon: moral values or saving lives?

Dinha man guy batan-ong dalaga nga nagkadungan pagka-ospital iyang ginikanan ug nagkinahanglag minilyong salapi nga ikabayad alang sa dinaliang operasyon aron sila maluwas.

Pobre kaayo sila ug walay kapaingnan. Busa, napugos pagduol-sangpit sa adunahang negosyante aron mangayog tabang. Tuod, andam moabaga sa tanang galastohan ang negosyante ubos sa kondisyon: nga iyang angkonon ang pagkababaye sa dalaga.

“Kon ikaw pa, ang nahimutang sa dapit sa dalaga, unsay imong buhaton? Dawaton ba nimo ang mapahimuslanong tanyag sa negosyante?” Sukna ko sa Law student.

Haskang dalia niyang nakatubag. “Daghan mang paagi, Sir, nga makatabang pagluwas sa tabangonong kinabuhi.

Moduol diay ko sa PCSO, sa Malasakit Program ug uban pang manggiluy-ong institusyon, siyarog walay motando nila.

Ug labaw sa tanan, sangpiton ko ang Labaw’ng Makagagahom nga tabangan ko Niya. Kay segurado gayod nga dili ko Niya pakyason. Miingon baya Siya:  nga ikaw, tawo, isip sanga sa Akong pagkabagon, ayaw gyog biya aron maangkon nimo ang kinabuhing dayon.”

Didto akong nasayran ang tinuorayng bulok sa pagkatawo sa maong tinun-an. Dili kay ang pagsalbar lang sa kinabuhi sa tawo ang iyang gimahal. Kon dili, hasta sab ang moral values nga iyang nakat-onan gikan sa Simbahan.

Pagkadalaygong mithi!